रुकुम पश्चिमका एकै घरका तीन जनाको भारतमा ज्यान गएको छ । 

जिल्लाको त्रिवेणी गाउँपालिका ९ टुनिबोट घर भएका ४८ वर्षीय दिपबहादुर ओली, उहाँकी ५० वर्षीया श्रीमति भिमा ओली र १७ वर्षीय छोरा मोहन ओलीको पहिरोमा परेर मृत्यु भएको हो । 

मृतकका भाई भिमबहादुर ओलीले दिनुभएको जानकारी अनुसार सोमबार बिहान ११ बजेतिर भारतको हिमाञ्चल प्रदेश सिम्ला जिल्लाको क्यारास्थित डेरामा बसिरहेको बेला भारी बर्षाको कारण आएको पहिरोले पुर्दा उहाँहरुको ज्यान गएको हो । 

उहाँहरु बिहानको कामबाट खाना खानको लागि डेरामा आउनुभएको बेला पहिरो आएको बताईएको छ । 

उहाँहरुसँगै जानुभएका मृतक ओलीका जेठा छोरा लोकेन्द्र ओली भने पहिरो आएको बेला डेरामा नभएकोले ज्यान जोगिएको छ । जेठा छोरा र बुवा आमाले काम गर्ने स्थान फरक रहेको थियो । 

उहाँहरु घरबाट रोजगारीको सिलसिलामा गत असार पहिलाे साता सपरिवार भारत जानुभएको थियो ।