सोसल मिडिया
रुकुम पश्चिम । योजनाको कम मूल्यांकन गरेको भन्दै रुकुम पश्चिमको सानीभेरी गाउँपालिकाका इन्जिनियर माथि कुटपिट भएको छ ।
गाउँपालिकामा कार्यरत इन्जिनियर रेशम लम्साल माथि बुधबार बिहान स्थानीय सिम्ली बजारमा कुटपिट भएको हो । खाना खाएर कार्यालय जान लागेको बेला सानीभेरी गाउँपालिका वडा नम्वर ३ निवासी गोविन्द ओलीले लम्साललाई कुटपिट गर्नुभएको हो ।
योजनाको कम मुल्यांकन गरेको भन्दै उहाँ माथी कुटपिट भएको बताईएको छ । इन्जिनियर लम्सालले आफूलाई ओलीले पहिले देखि नै धम्की दिदै आएको र आज कुटपिट गरेको बताउनुभयो ।
उहाँले आफ्नो टाउकोमा तीन मुक्का र पेटमा लात्ति हानेर सडकमा लडाईएको बताउनुभयो । कुटपिटपछि लम्सालको निधारमा निलो डाम भएको छ ।
सानीभेरी गाउँपालिका वडा नम्बर ३ को बेल्टापु रंगशाला निर्माणको मुल्यांकनलाई लिएर इन्जिनियरमाथि कुटपिट भएको बताइएको छ । रंगशाला निर्माण समितिका अध्यक्ष ओलीले यही विषयलाई लिएर इन्जिनियर माथि कुटपिट गरेको सानीभेरी गाउँपालिकाका प्रमुख प्रशासकीय अधिकृत दिपक बुढाथोकीले बताउनुभयो । उहाँका अनुसार इन्जिनियरमाथि कुटपिट गर्ने ओलीलाई प्रहरी चौकी सिम्लीले नियन्त्रणमा लिएको छ ।
कुटपिट गर्ने ओली नेकपा माओवादी केन्द्र निकट युवा संगठन वाईसियल नेपाल रुकुम पश्चिमका जिल्ला संयोजक र जिल्ला खेलकुद विकास समिति रुकुम पश्चिमको कार्यबहाक अध्यक्ष समेत हुनुहुन्छ ।
