रुकुम पश्चिम । गत सोमबार भारतको हिमाचल प्रदेश सिम्ला जिल्लाको क्यारामा गएको पहिरोमा परेर ज्यान गुमाएका रुकुम पश्चिमको त्रिवेणी गाउँपालिका –९ टुनिबोटका एउटै घरका तीन जनाको आज बिहिबार गाउँमै अन्त्येष्टि गरिएको छ ।  

टुनिबोट टोलका ४८ वर्षिय देव बहादुर ओली, उहाँकी ५० वर्षिया श्रीमती भिमा ओली र १७ वर्षिय कान्छो छोरा मोहन ओलीको आज अन्त्येष्टि  गरिएको हो । 

भारतबाट आज बिहान शव गाउँमै ल्याई पुर्याएपछि टुनिबोट टोल नजिकैको मसानघाटमा उहाँहरुको अन्त्येष्टि गरिएको त्रिवेणी गाउँपालिका वडा नम्वर ९ का वडा सदस्य सन्तोष ओलीले जानकारी दिनुभयो । 

उहाँहरुको सपरिवार मजदुरीको लागि भारत जानुभएको थियो । क्यारामा अविरल वर्षा भइरहेको बेला ओली परिवार डेरा लिएर बसेको घरनै पहिराले पुरेको थियो । बिहानको काम सकेर डेरामा खाना खान आएको बेला पहिरो आएको थियो । 

वडा सदस्य ओलीका अनुसार आमा भिमा र छोराहरु लोकेन्द्र र मोहन असार पहिलो हप्तामा मात्रै त्यहाँ पुग्नु भएको थियो । देवबहादुर भने गत मङसीर महिनामा भारत जानुभएको थियो ।

जेठा छोरा लोकेन्द्र ओली कामको सिलसिलामा अर्को स्थानमा भएकोले ज्यान जोगिएको थियाे । आज जेठा छोरा लोकेन्द्र ओलीले आमाबुवा र भाईलाई दागबत्ति दिनुभएको हो । 

शव अन्त्येष्टि कार्यक्रममा त्रिवेणी गाउँपालिकाका अध्यक्ष गणेश केसी, उपाध्यक्ष राज कुमारी रेउले, पूर्व अध्यक्ष झक्कु प्रसाद घर्ती लगायत स्थानीयको ठुलो संख्यामा उपस्थिति रहेको थियो । यस घटनाले त्रिवेणी गाउँपालिका र समग्र रुकुम शोकाकुल बनेको छ । 

भारतबाट मृतकहरुको शव ल्याउन त्रिवेणी गाउँपालिकाले बिशेष पहल गरेको थियो । शवहरु भारत सरकारको सहयोगमा रुपैडियासम्म ल्याईएको थियो भने त्यहाँबाट त्रिवेणी गाउँपालिकाको एम्बुलेन्समा शव ल्याईएको थियो ।