सोसल मिडिया
रुकुम पश्चिमको चौरजहारी नगरपालिका वडा नम्वर ११ मा रहेको एक सामुदायिक वन क्षेत्रमा रुख फडानी भएको भन्दै वन उपभोक्ता समितिले उजुरी गरेको छ ।
स्थानीय जनकल्याण सामुदायिक वन उपभोक्ता समितिले रुख फडानी भएपछि आवश्यक कारबाहिको माग गर्दै चौफा सव डिभिजन कार्यालयमा निवेदन दर्ता गराएको हो । उपभोक्ता समितिले चौरजहारी नगरपालिका वडा नम्वर ११ का वडा अध्यक्ष तुल्से ओलीको निर्देशनमा सामुदायिक वनका रुखहरु काटिएको भन्दै उजुरी दिएको हो ।
जनकल्याण सामुदायिक वन उपभोक्ता समितिका अध्यक्ष शान्त बहादुर शाहले समितिलाई जानकारी नै नदिई सामुदायिक वन क्षेत्रका ३१ वटा रुखहरु काटिएको बताउनुभयो । उहाँले वडा अध्यक्षकै निर्देशनमा गैर कानूनी ढंगले रुखहरु काटिएको उल्लेख गर्नुभयो ।
विभिन्न प्रजातीका ३१ वटा रुखहरु काटिएको अवस्थामा फेला पारेको अध्यक्ष शाहले बताउनुभयो । उक्त सामुदायिक वनमा रहेका साल, साँधन र खनायो प्रजातीका र बढी मात्रामा सल्ला प्रजातीका रुखहरु काटिएको बताईएको छ ।
रुख काट्ने बिषयमा वन कार्यालय र सामुदायिक वन उपभोक्ता समितिलाई कुनै पनि जानकारी नभएको शाहको भनाई छ । उहाँले वन ऐन अनुसार कारबाहिको माग गरेर सम्बन्धित निकायमा उजुरी दिएको बताउनुभयो ।
चौरजहारी नगरपालिका वडा नम्वर ११ को टाटाबाट सर्केना हुँदै जोगिनेटासम्म बिद्युत लाईन बिस्तार गर्ने क्रममा केहि रुखहरु काटिएको बताईएको छ । यस बिषयमा चौफा सव डिभिजन कार्यालयका निमित्त सहायक वन अधिकृत अमर बहादुर बिष्टले उपभोक्ता समितिको उजुरी पश्चात स्थालगत अनुगमन गरिएको र रुखहरु काटिएको पाईएको बताउनुभयो ।
उहाँले जनकल्याण सामुदायिक वनको ३१ वटा र सर्केना सामुदायिक वनको चार वटा गरेर ३५ वटा रुख काटिएको जानकारी दिनुभयो । नेपाल विद्युत प्राधिकणले बिद्युत तार बिस्तार गर्ने क्रममा रुखहरु काटेको बिष्टले जनाउनुभयो । अरु रुखहरुपनि काटिने अवस्था रहेकोले अहिलेलाई रोकिएको छ ।
वातावरणीय प्रभाव मूल्यांकन गरेर सम्बन्धित वन डिभिजन कार्यालयको रुख काट्न मिल्ने वा नमिल्ने निर्णय गर्नुपर्नेमा निर्णय नहुँदै रुख काटिएको निमित्त सहायक वन अधिकृत बिष्टले बताउनुभयो । उहाँले काटिएका रुखहरुको बरामदी मुचुल्का बनाएर आवश्यक कारबाहिको लागि माथिल्लो निकायमा पठाईएको जनाउनुभयो ।
कानूनी प्रक्रिया अनुसार काम गर्नुपर्नेमा वडा अध्यक्षको जोड
यस बिषयमा चौरजहारी नगरपालिका वडा नम्वर ११ का वडा अध्यक्ष तुल्से ओलीले रुख काट्ने बिषयमा आफुले कोहि कसैलाई निर्देशन नदिएको बताउनुभयो । विधि र प्रक्रिया अनुसार मात्र काम अगाडि बढाउनुपर्छ भनेर आफूले सम्पूर्ण कागजी प्रक्रिया जुटाउन सहयोग गरेको उहाँको भनाई छ ।
वडाबाट नगरपालिका, बिद्युत कार्यालय हुँदै वन डिभिजन कार्यालयसम्म फाईल पुर्याएको तर निर्णय हुन ढिलाई भएको वडा अध्यक्ष ओलीले जानकारी दिनुभयो । गाउँमा विकासका काम गर्दा विवाद नहोस् भनेर आफूले सबै कुराहरु कानूनी प्रक्रिया अनुसार नै गरेको उहाँको भनाई रहेको छ ।
अनावश्यक रुपमा रुख काट्न नहुनेमा आफू रहेको वडा अध्यक्षले बताउनुभयो । गाउँमा बिद्युत लाईन बिस्तार गर्नुपर्ने र उक्त क्रममा वन क्षेत्रमा क्षति नहोस् भन्ने आफ्नो धारणा रहेको उहाँले उल्लेख गर्नुभयो ।
