सोसल मिडिया
रुकुम पश्चिम । रुकुम जिल्ला अदालतमा सम्बन्ध बिच्छेदका मुद्धाहरु बढी मात्रामा आउने गरेका छन् । आर्थिक वर्ष ०७९/०८० मा अदालतको लगतमा जम्मा भएका मुद्धाहरु हेर्दा दर्ता हुने र फैसला हुनेमा सम्बन्ध बिच्छेदका मुद्धाहरु बढी रहेका छन् ।
अदालतका अनुसार गत आर्थिक वर्ष ०७९/०८० मा फैसला भएका मुद्धा मध्य ४५.७७ प्रतिशत मुद्धा सम्बन्ध बिच्छेदका रहेका छन् । निमित्त श्रेष्तेदार लक्ष्मण बिकले गत आवमा अदालतबाट ४३७ मुद्धा फैसला भएका मध्य दुई सय वटा मुद्धा सम्बन्ध बिच्छेका रहेको बताउनुभयो ।
उहाँले अदालतमा रहेका जम्मा मुद्धा मध्य ४५.२७ प्रतिशत मुद्धा सम्बन्ध बिच्छेदकै रहेको जनाउनुभयो । जम्मा ६०३ वटा मुद्धा आएकोमा २७३ वटा सम्बन्ध बिच्छेदका रहेका छन् । कुल मुद्धा मध्य ४०१ वटा देवानी, २०२ मुद्धा फौजदारी रहेका छन् । दुई वटा मुद्धा भने पुनरावेदन तर्फका छन् ।
रुकुम जिल्ला अदालतमा जम्मा भएका कुल मुद्धा मध्य २३० वटा मुद्धा अघिल्लो वर्षबाट जिम्मेवारी सरिआएका थिए । अघिल्लो वर्ष लगत सरिआएमा मुद्धा मध्य १३६ वटा देवानी, ९४ वटा फौजदारी र दुई वटा पुनरावेदन तर्फका मुद्धा रहेका छन् । यस वर्ष भने अदालतमा २६५ देवानी र १०८ वटा फौजदारी तर्फका मुद्धा दर्ता भएको बिकले उल्लेख गर्नुभयो ।
अघिल्लो आर्थिक वर्ष ०७८/०७९ मा अदालतमा पनि ४३.८८ प्रतिशत मुद्धा सम्बन्ध बिच्छेदका दर्ता भएका थिए ।
सम्बन्धित समाचार ........
