मुसिकोटबाट हराएका तीन बालक लुहाममा फेला

रुकुम पश्चिम । रुकुम पश्चिमको मुसिकोटबाट हराएका तीन जना बालकहरु सल्यानको लुहाममा भेटिएका छन् । 

मुसिकोट नगरपालिका वडा नम्वर १ का १२ वर्षिय आयुष किरण बि.क., सोहि स्थानका १३ वर्षिय रोहित खत्री र १५ वर्षिय दिनेश पुरीलाई प्रहरीले फेला पारेको हो । 

उनीहरु साउन ९ गते बेलुका ६ बजेदेखि हराएका थिए । जिल्ला प्रहरी कार्यालयका प्रहरी निरीक्षक विष्णु प्रसाद श्रेष्ठका अनुसार बालकका आफन्तहरुले खोजतलास गरीपाउँ भनि जानकारी गराएपश्चात प्रहरीले खोजी कार्य थालेको थियो ।

जिल्ला प्रहरी कार्यालय सल्यानसँगको समन्वयमा खोजतलास गर्ने क्रममा तीनै जना बालकहरुलाई सल्यानको त्रिवेणी गाउँपालिका ६ लुहाममा सकुशल फेला पारिएको प्रहरी निरीक्षक श्रेष्ठले जानकारी दिनुभयो । उनीहरुलाई हराएको भोलिपल्टै फेला पारिएको हो ।

रुकुम पश्चिमबाट दांगतर्फ जाने बसमा चढेर उनीहरु त्यहाँसम्म पुगेको बताईएको छ । हरायका तीन जना बालकहरुलाई जिल्ला प्रहरी कार्यालय रुकुम पश्चिममा ल्याएर बिहिबार अभिभावकको जिम्मा लगाईएको प्रहरीले जनाएको छ ।