सोसल मिडिया
जाजरकोट घर भई हाल संयुक्त राष्ट्रसंघको आह्वानमा शान्ति स्थापना कार्यका लागि दक्षिण सुडानमा रहेका एक नेपाली सेनाको मृत्यु भएको छ ।
सुडानमा तैनाथ शेर गण (शान्ति सेना) बाह्रौं डफ्फामा कार्यरत अमल्दार रामबहादुर बाँठाको मृत्यु भएको हो । बाँठाका परिवारका सदस्यहरुले जनाए अनुसार साउन ११ गते उहाँको मृत्यु भएको खबर नेपाली सेनाको जंङ्गी अड्डाले दिएको छ ।
जाजरकोटको भेरी नगरपालिका वडा नम्वर ३ स्याला निवासी करिब ३८ वर्षिय अमल्दार बाँठा उक्त शान्ति सेना गण तैनाथ दक्षिण सुडानको रुम्बेकस्थित गण रहेको भेहिकल वर्कशपमा घाँटीमा पासो लगाई झुण्डिएको अवस्थामा फेला परेको जनाईएको छ ।
मृतक बाँठाको निजको पार्थिव शरीर पोष्टमार्टमको प्रक्रिया पश्चात नेपाल ल्याउने क्रममा रहेको आफन्तजनहरुले बताएका छन् ।
गत वर्षको भदौ दोश्रो साता सुडान जानु भएका उहाँ आउँदो भदौ दोश्रो साता नै नेपाल फर्कने कार्यक्रम रहेको थियो । मृतक बाँठाको श्रीमती, एक छोरा र एक छोरी हुनुहुन्छ ।
