सोसल मिडिया
रुकुम पश्चिम । रुकुम पश्चिमको मुसीकोट नगरपालिका वडा नम्वर १३ को काउलेचौरमा चार महिनापछि खानेपानी सुचारु भएको छ ।
बैशाख १० गते मुहानको ट्याङ्कीमा भल पस्दा बिग्रिएको न्याखोली खानेपानी आयोजना स्थानीयले मर्मत गरे पछि गाउँमा खानेपानी सुचारु भएको हो ।
गाउँ देखि पाँच किलोमिटर टाढा रहेको मुहानबाट पानी आउन छाडेपछि गाउँमा खानेपानीको समस्या भएको थियो । स्थानीय रामलाल खड्काले गाउँका स्थानीयहरुले मुहानमा रहेको ट्याङ्की सफाई र ट्याङ्कीमा रहेको फोहोर फालेसंगै गाउँमा खानेपानी सुचारु भएको बताउनुभयो ।
भिरबाट पानीको पाईप हालिएकोले बेला बेलामा बिग्रिरहने गरेको खड्काको भनाई छ ।
गाउँमा आउने पानीको मुहानमा रहेको ट्याङ्कीमा लेदो, माटो पसे पछि काउलेचौरका स्थानीयले गाउँ देखि तल रहेको मुहानको पानी पिउदै आएका थिए ।
चार महिना सम्म आधा घण्टा टाढाबाट पानी ल्याएका स्थानीयले मुहान मर्मत गरेर गाउँमै पानी ल्याएपछि खानेपानीको दुख हटेको जनाएका छन् ।
