सोसल मिडिया
जाजरकोट । नेपाल निजामती कर्मचारी संगठन जिल्ला कार्यसमिति जाजरकोटले रक्तदान कार्यक्रम सम्पन्न गरेको छ ।
संगठनले आज रुकुम पश्चिमको चौरजहारीमा नेपाल रेडक्रस सोसाईटी चौरजहारीद्वारा सञ्चालित ब्लड बैंकमा रक्तदान कार्यक्रम सम्पन्न गरेको हो ।
संगठनका केन्द्रिय सदस्य तुलाराम गिरीका अनुसार शहिद मनोज झपेन्द्र सुरेन्द्र स्मृति दिवसको सन्दर्भमा रक्तदान कार्यक्रम आयोजना गरिएको हो ।
नेपाल निजामती कर्मचारी संगठनमा आवद्ध ६ जना कर्मचारीहरुले रक्तदान गरेको केन्द्रीय सदस्य गिरीले बताउनुभयो । चौरजहारीमा साउन १ गतेबाट सुरु भएको ब्लड बैंकले जाजरकोट, रुकुम पश्चिम, सल्यान, रुकुम पूर्व, डोल्पा लगायतका जिल्लाका बिरामीहरुको लागि सेवा दिने भएकोले जाजरकोटबाट चौरजहारीमा आएर रक्तदान गरिएको संगठनले जनाएको छ ।
विभिन्न समयमा कर्मचारी आन्दोलनमा शहादत प्राप्त गरेका खोटाङका मनोज जोशी, कास्कीका झपेन्द्र कार्की र मुगु जिल्लाका सुरेन्द्र बि.क.को सम्झनामा हरेक वर्षको साउन १५ गते नेपाल निजामती कर्मचारी संगठनले शहिद स्मृति दिवस मनाउँदै आएको छ । तीनै जना शहिदहरुलाई सरकारले २०७४ माघ २२ मा राष्ट्रिय शहिदको रुपमा घोषणा समेत गरेको छ ।
रक्तदान गर्ने रक्तदाताहरुलाई ब्लड बैंकको तर्फबाट नेपाल रेडक्रस सोसाईटी चौरजहारीले सम्मान समेत गरेको रेडक्रस सोसाइटी चौरजहारीका कोषाध्यक्ष गोपाल लामिछानेले जानकारी दिनुभयो ।
