सोसल मिडिया
रुकुम पश्चिम । आफूले आर्जन गरेको आर्थिक रकम व्यक्तिगत सुखसयलको काममा खर्च गर्ने, थप सम्पत्ति जोड्ने मान्छेहरुको भिडमा एक युवा व्यवसायीले उदाहरणीय काम गर्दै आउनुभएको छ ।
स्थायी घर रोल्पाको पाछाबाङ भई हाल दांगको तुलसीपुरमा व्यवसाय गर्दै आउनुभएका युवा व्यवसायी नन्दबहादुर डाँगीले आफूले आर्जन गरेको रकमबाट हालै रुकुम पश्चिमका बालबालिकाहरुलाई सहयोग गर्नुभएको छ ।
उहाँले रुकुम पश्चिमको आठबिसकोट नगरपालिका १४ मा रहेको जनविकास माध्यमिक बिद्यालय ज्यामिरकोटमा अध्ययनरत दुई जना बालबालिकालाई शैक्षिक सामाग्री सहयोग गर्नुभएको हो । बिद्यालयका प्रधानाध्यापक दिपक संगम थापाले दिनुभएको जानकारी अनुसार बिद्यालयमा अध्ययनरत कक्षा ६ कि छात्रा अञ्जली चन्द र कक्षा ३ मा अध्ययनरत छात्र सन्तोष बिकलाई शैक्षिक सहयोग गरिएको हो ।
छात्रा चन्दको आमाको मृत्यु भैसकेको छ भने छात्र बिक गरिब तथा दलित परिवारको हुनुहुन्छ । उहाँहरुको पढाईमा सहयोग गर्ने उद्धेश्यले डाँगीले शैक्षिक सामाग्री उपलब्ध गराउनुभएको हो ।
प्रधानाध्यापक थापाका अनुसार शुक्रबार बिद्यालयले एक कार्यक्रम गरि शैक्षिक सामाग्री हस्तान्तरण गरेको हो । दुबै जनालाई बिद्यालय पोशाक, झोला, वर्षभरी पुग्ने कापी, कलम, ज्यामिती बक्स लगायतका सामाग्री प्रदान गरिएको हो ।
शैक्षिक सामाग्री हस्तान्तरण कार्यक्रमका प्रमुख अतिथी हरिप्रसाद शर्माले धन कमाएर थुपार्नु भन्दा समाजसेवा गर्नुपर्छमा ठुलो पुण्यकर्म हुने बताउनुभयो । उहाँले धनका धनी भन्दा पनि मनका धनिहरु समाजका उदाहरणिय पात्र हुने समेत उल्लेख गर्नुभयो ।
दाङ तुलसीपुरमा सहुलियत किचन हाउस संचालन गरेर १२० रुपियाँमै मासुभात दिने गरेर व्यवसाय गर्दै आउनुभएका डाँगी सफल युवा व्यवसायीको रुपमा चिनिनु हुन्छ ।
