सोसल मिडिया
जाजरकोट । अन्तर्राष्ट्रिय मित्रता दिवसको अवसरमा रक्तदान गरिएको छ । मालिका सामुदायिक सेवा केन्द्र तथा सामुदायिक प्रहरी सेवा केन्द्र जाजरकोटले रक्तदान कार्यक्रम सम्पन्न गरेको हो ।
नेपाल रेडक्रस सोसाईटी उपशाखा कार्यालय चौरजहारीद्धारा चौरजहारी नगरपालिका १ मा सञ्चालित ब्लड बैंककाे लागि सेवा केन्द्रले अन्तर्राष्ट्रिय मित्रता दिवसको अवसरमा पहिलो रक्तदान कार्यक्रम गरेको हो ।
सेवा केन्द्रको १६ जनाकाे टोलीले रक्तदान गरेको रेडक्रस सोसाईटी चौरजहारीका कोषाध्यक्ष गोपाल लामिछानेले बताउनुभयो । उहाँका अनुसार आज सेवा केन्द्रद्धारा गरिएको रक्तदान कार्यक्रमबाट १६ पिन्ट रगत संकलन भएको छ ।
चौरजहारीमा रुकुम पश्चिम, जाजरकोट, सल्यान, डोल्पा लगायतका जिल्लाका बिरामीको लागि साउन १ गतेदेखि ब्लड बैंक सुरु भएको र रक्तदान नै जीवनदान भएकोले मित्रता दिवसको सन्दर्भ पारेर रक्तदान गरिएको सेवा केन्द्रका उपाध्यक्ष बसुन्धरा नेपालीले जानकारी दिनुभयो ।
उहाँले रगतको अभावको कोहि कसैले ज्यान गुमाउन नपरोस् र आवश्यकता परेको बेलामा ब्लड बैंक मार्फत रगत उपलब्ध गराउन सकियोस् भनेर पनि रक्तदान गरिएको बताउनुभयो ।
रक्तदान गर्ने सेवा केन्द्रको टोलीलाई नेपाल रेडक्रस सोसाइटी चौरजहारीका सभापति तेजबहादुर बटालाले प्रशंसापत्र सहित सम्मान गर्नुभएको थियो ।
