सोसल मिडिया
रुकुम पश्चिम । शनिबार रातीको अबिरल बर्षाको कारण त्रिवेणी गाउँपालिकाका केहि घर र गोठ भत्किएका छन् भने पहिरोमा पुरिएर गाई र कुखुरा मरेका छन् ।
त्रिवेणी गाउँपालिका वडा नम्वर ५ का वडा अध्यक्ष रनबहादुर पुनका अनुसार वर्षासँगैको पहिरोका कारण वडा नम्वर ५ का डिल्ली बहादुर ओलीको गोठघर पहिरोले पुरेको छ । पहिरोले गोठ पुरिदा एक वटा दुुहुनो गाई र केहि कुखुराको मृत्यु भएको छ । वडा अध्यक्ष पुनका अनुसार उक्त गोठमा राखिएको अन्नपात समेत पहिरोमा पुरिएको छ ।
त्यसैगरी सोहि वडाका बलाराम बिकको घर भत्किएको छ भने घरमा भएको अन्नपात र सरसामान पूर्ण रुपमा क्षति भएको छ । वडा अध्यक्ष पुनले बलारामको परिवार अहिले अंकलको घरमा सहारा लिएर बसेको जानकारी दिनुभयो ।
लगातारको बर्षाको कारण उक्त वडाका १५ वटा घरधुरीमा पहिराले आंशिक क्षति गरेको छ । गाउँ आउने बाटो अवरुद्ध भएको छ भने वडाका विभिन्न स्थानमा रहेका खेतबारी बगाएको वडा अध्यक्ष पुनले उल्लेख गर्नुभयो ।
उहाँका अनुसार वडाका दमाई टोल र पल्लोडेराटोल समेत पहिरोको जोखिममा रहेका छन् । वडा अध्यक्षले वडावासीलाई उच्च सतर्कताका साथ बस्न अनुरोध गर्नुभएको छ ।
त्यसैगरी बर्षाका कारण त्रिवेणी गाउँपालिका वडा नम्बर ८ गरेनाका पहलसिंह खड्काको दुई तले घर भत्किएको छ । घरमाथीबाट खसेको पहिरोले उहाँको घरमा पूर्णरुपमा क्षति भएको छ । फागुन महिनामा निर्माण गरिएको घर ६ महिना नपुग्दै पहिरोले पुर्ण रुपमा क्षति गरेको वडाध्यक्ष नन्नराम खड्काले जानकारी दिनुभयो ।
पहिरोले घरभित्र रहेका समान, अन्न, लत्ताकपडा पुरिएका छन् । घरमा पूर्ण रुपमा क्षति पुगेपछि पहलसिंहको पाँच जनाको परिबार आफन्तको घरमा शरण लिएर बसिरहेको छ ।
त्यस्तै शनिबार राति आएको पहिरोले त्रिवेणी १० मान्टुराका सपबिर ओलीको दुई वटा पानी घट्ट, पिस्न लगिएको स्थानीयको करिब दुई सय केजी अन्न पनि पुरिएको छ । यसका साथै ओलीकै मान्टुरामा रहेको चार रोपनी खेतमा लगाएको धानबाली समेत पुरिएको बताइएको छ ।
