सोसल मिडिया
रुकुम पश्चिम । आईतबार दिउँसोबाट आएको हावाहुरीसँगैको पानीले रुकुम पश्चिमका विभिन्न स्थानमा ठुलो मात्रामा क्षती गरेको छ । हावाहुरीको कारण भित्र्याउने अवस्थामा रहेको मकैखेतीमा बढी मात्रामा क्षती भएको बताईएको छ ।
मकै खेतीमा व्यापक क्षती भएकोले यकिन तथ्याङक संकलनको काम सोमबारबाट नै सुरु गरिएको कृषि विकास कार्यालय रुकुम पश्चिमका निमित्त कार्यालय प्रमुख मिनबहादुर केसीले बताउनुभयो ।
कर्णाली प्रदेश भूमि व्यवस्था, कृषि तथा सहकारी मन्त्रालयले समेत तीन दिन भित्रमा क्षतीको विवरण संकलन गरेर पठाउन निर्देशन गरे अनुसार आजै जिल्लाका ६ वटै पालिकाहरुमा प्राविधिक टोलीहरु पठाईएको केसीले जानकारी दिनुभयो ।
उहाँका अनुसार आईबारको हावाहुरीले मकैबालीमा गरेको क्षतीको कारण उत्पादनमा निकै कमी आउने देखिन्छ । उहाँले जिल्लाको चौरजहारी नगरपालिका र आठविसकोट नगरपालिका क्षेत्रमा सबैभन्दा बढी मात्रामा क्षती गरेको सूचना आएको उल्लेख गर्नुभयो ।
तुलनात्मक रुपमा चौरजहारी र आठविसकोट नगरपालिका तथा सानीभेरी, त्रिवेणी र बाँफिकोट गाउँपालिकामा बढी क्षती भएको छ भने मुसीकोट नगरपालिका क्षेत्रमा कम क्षती भएको आँकलन कृषि विकास कार्यालयले गरेको छ । सबै पालिका क्षेत्रमा लगाईएको मकैबाली केहि दिनमै ढल्याउने तयारीमा किसानहरु रहेका थिए । मकै घर ल्याउन तयारीमा रहेको बेलामा हावाहुरी र पानीले बिगारेको भन्दै किसानहरु चिन्तित बनेका छन् । आठविसकोट नगरपालिका -१४ का किसान खम्बु मल्लले पाक्ने बेलाको मकै भाँचिएपछि के खाने भनेर पीर पर्ना थालेको बताउनुभयो ।
उहाँका अनुसार आठविसकोट नगरपालिकाको वडा नम्वर १३ र १४ मा मात्र करिब २६० घरपरिवारले १५० बिघा जग्गामा लगाएको मकैबाली हावाहुरीले ढालेको छ । यसका साथै किसानहरुले स्थनीय सरकारबाट राहतको आशा गरेका छन् ।
मकैबालीका साथै विभिन्न स्थानमा रहेका घर र गोठहरुमा समेत क्षती भएको छ । चौरजहारी नगरपालिकाका नगरप्रमुख पुष्प बादीले नगरका अधिकांश भागमा रहेका किसानका गोठ र केहि स्थानका घर समेत हावाहुरीसँगैको पानीले भत्काएको बताउनुभयो ।
“बालीनाली झन् ध्वस्त नै बनायो”, नगर प्रमुख बादीले भन्नभुयो, “वडा वडाबाट क्षतीको विवरण संकलन गर्दैछौ, बिद्युत लाईन समेत अवरुद्ध भएकोले सबै वडामा समन्वय र सम्पर्क समेत हुन सकिरहेको छैन ।” विवरण यकिन भएमा क्षतीपूर्तिको प्रक्रियामा जाने समेत उहाँको भनाई रहेको छ ।
आठविसकोट नगरपालिका प्रमुख रबि केसीले विपद्ले किसानको मकै बालीमा पुर्याएको क्षतीको मूल्यांकन गरेर राहत उपलब्ध गराउन स्थानीय सरकार प्रतिबद्ध रहेको बताउनुभएको छ । उहाँले नगरपालिकाभर करिब तीन हजार हेक्टर जमिनमा लगाईएको मकैखेतीमा क्षती पुगेको उल्लेख गर्नुभयो ।
