सोसल मिडिया
रुकुम पश्चिम । पशुपंक्षीहरुमा लाग्ने विभिन्न रोगहरुको पहिचानका लागि जिल्लामै प्रयोगशाला परिक्षण सेवा सञ्चालन भएपछि रुकुम पश्चिमका किसानहरुलाई सहज भएको छ ।
पशु अस्पताल तथा पशु सेवा कार्यालयमा गत वर्षदेखि सञ्चालन भएको प्रयोगशाला परिक्षणले विभिन्न रोगको पहिचान तथा निदानका लागि सहज भएको हो । कार्यालयका निमित्त प्रमुख ज्ञानु कुमार शर्माका अनुसार जिल्लामै प्रयोगशाला परिक्षण सेवा सुरु भएपछि रोगको समयमै पहिचान र निदानका लागि कार्य गर्न सजिलो भएको छ ।
यस अघि सञ्चालित प्रयोगशाखामा पशुचौपायको गोबर र पिसाब मात्र परिक्षण हुने गरेको थियो । गत वर्षबाट पशुहरुमा लाग्ने रेबिज, पिपिआर, खोरेत, स्वाईन फिभर तथा पंक्षीहरुमा लाग्ने रानीखेत, गम्बारो लगायतका रोगहरुको एन्टिजेन परिक्षण रुकुमपश्चिममै हुने गरेको छ । उक्त सेवा बिस्तार भएयता करिब आठ सय पशुपंक्षीको एण्टिजेन परिक्षण गरिएको छ ।
कार्यालयका अनुसार १३७ वटाको रेबिज, ३०८ वटाको पिपिआर, ६८ वटामा रानीखेत, १०३ वटामा गम्बारो, ५३ वटामा खोरेत र १०५ वटामा स्वाई फिभर गरेर ७७४ वटाको एण्टिजेन परिक्षण जिल्लामै गरिएको छ । कार्यालयले नियमित कार्यक्रम अन्तर्गतकै सेवामा प्रयोगशाला परिक्षणको दायरा बढाएको हो ।
जिल्लामै प्रयोगशाला परिक्षणको दायरा बढाएपछि पशुपंक्षीमा लाग्ने विभिन्न रोगहरु पहिचानका लागि नमूना संकलन गरेर सुर्खेत, काठमाडौं जानुपर्ने अवस्था हटेको छ । निमित्त कार्यालय प्रमुख शर्माले पशुपंक्षीहरुमा कुनै रोग लागेमा वा शंका लागेमा प्राविधिकहरु फिल्डमा खटिएर नमूना तथा स्वाब संकलन गरेर ल्याउने र अहिले जिल्लामै परिक्षण गर्ने गरिएको छ । यसका लागि स्थानीय सरकारसँग समेत सहकार्य हुने गरेको छ ।
यस कार्यले तत्कालै रोगको पहिचान गरेर आवश्यक औषधि उपलब्ध गराउन र क्षती रोक्न प्रभावकारी भएको उहाँको भनाई रहेको छ । पिपिआर रोगको परिक्षण सेवा भने जिल्लामा रहेको छैन । यसका लागि जिल्ला बाहिर नै जानुपर्ने अवस्था रहेको छ ।
पशुपालनका लागि राम्रो मानिएको यस जिल्लामा बिस्तार भएको प्रयोगशाला परिक्षण सेवाले पशुपालक किसानहरुलाई समेत सहज भएको छ । पशुचौपायहरुमा विभिन्न संक्रामक रोगहरु लागेर हुने क्षती रोक्न यस सेवाले महत्वपूर्ण भूमिका खेलेको किसानहरुको भनाई रहेको छ ।
