सोसल मिडिया
रुकुम पूर्व । सिस्ने गाउँपालिकाको वडा नम्वर २ नायगाडमा एकीकृत घुम्ती शिविर सम्पन्न भएको छ ।
सिस्ने गाउँपालिकाको आयोजनामा स्वास्थ्य शिविर, अपांगता भएका तथा जेष्ठ नागरिक परिचयपत्र वितरण, टोल विकास समिती गठनका लागि अभिमुखिकरण र कृषकहरुलाई तरकारीको बीउ बिजन वितरण सहितको घुम्ती शिविर आईतबार सम्पन्न गरिएको हो ।
सिस्ने गाउँपालिका प्रशासन अधिकृत अरुण ओलीका अनुसार एकीकृत घुम्ती शिविरमा ३३ जना महिला र १० जना पुरुष गरेर ४३ जनाको स्वास्स्थ्य परिक्षण गरिएको छ । त्यसैगरी १२ जनालाई अपांगता परिचयपत्र प्रदान गरिएको छ भने १ जनालाई जेष्ठ नागरिक परिचयपत्र वितरण गरिएको छ ।
शिविरमा १२३ जना कृषकहरुलाई रायो साग, गाँजर, मुला, धँनिया र केराउको बीउ वितरण समेत गरिएको छ । यसका साथै टोल विकास समिती गठन सम्बन्धी अभिमुखिकरण तालिम पनि गराइएको ओलीले बताउनुभयो ।
सिस्ने गाउँपालिकाको दुर्गम वडाको रुपमा रहेको १ र २ नम्बर वडावासीहरुलाई गाउँमै सेवा उपलब्ध गराउने उद्देश्यले शिविरको आयोजना गरिएको सिस्ने गाउँपालिका अध्यक्ष कृष्ण रेग्मीले बताउनुभयो । उहाँका अनुसार गाउँका नागरिकको सहजताको लागि घर आँगनमै पुगेर सेवा प्रवाह गरिएको हो ।
गाउँमै एकिकृत सेवा पाएपछि स्थानीयवासीहरु खुशि भएका छन् । एकिकृत सेवा गाउँमै पाउँदा गाउँपालिकाको केन्द्र तथा जिल्ला सदरमुकाम जानुपर्ने बाध्यता नभएको उनीहरुको भनाई छ । नियमित रुपमा गाउँमा घुम्ति सेवा सञ्चालन हुनुपर्ने माग समेत स्थानीयको रहेको छ ।
आइतबार वडा २ बाट सुरु गरिएको शिविर २३ गते वडा नम्बर १ को पाखापानीमा सन्चालन गरिने सिस्ने गाउँपालिकाले जनाएको छ ।
शिविरमा सिस्ने गाउँपालिका अध्यक्ष कृष्ण रेग्मी, उपाध्यक्ष गोपाल रेउले, प्रमुख जिल्ला अधिकारी माधव प्रसाद शर्मा, रुकुम पुर्व अस्पतालका मेडिकल अधिकृत पुर्ण पुन र अनिश श्रेष्ठ र गाउँपालिकाबाट सम्बन्धित शाखाका प्रमुख तथा प्रतिनिधिहरु लगाएतको टोलीको उपस्थिति रहेको छ ।
