रुकुम पश्चिम । रुकुम पश्चिमको सदरमुकाम मुसीकोट नगरपालिका –१ खलङगाको एक होटेलमा मृत अवस्थामा भेटिएकी महिलाको पहिचान खुलेको छ ।

जिल्ला सदरमुकामको मुख्य बजारमा रहेको होटेल सत्कारमा मृत अवस्थामा भेटिएकी महिला जिल्लाको मुसिकोट नगरपालिका वडा नम्वर ७ साँखकी २८ वर्षिया भावना बिक रहेको प्रहरीले जनाएको छ । 

जिल्ला प्रहरी कार्यालय रुकुम पश्चिमका सूचना अधिकारी प्रहरी निरिक्षक धर्मेन्द्र खड्काका अनुसार होटेलको कोठा नम्वर १ मा मंगलबार बिहान महिलाको शव फेला परेको थियो । त्रिवेणी गाउँपालिका ठेगाना भएका विकास केसीको नामबाट गत आईतबार होटलको कोठा बुक भएको देखिन्छ ।

सिरकले शव छोपेको अवस्थामा महिलाको शव रहेको थियो । सिरक उठाएर हेर्दा टाउकोमा कपडा बाँधिएको र रक्ताम्य अवस्थामा शव रहेको छ । घटनाको अनुसन्धान हुँदै गरेको प्रहरीले  जनाएको छ ।

प्रहरी निरीक्षक खड्काले घटनाको अनुसन्धानका लागि नेपाल प्रहरीको केनाइन कुकुर शाखा कोहलपुरबाट तालिम प्राप्त कुकुर र प्रदेश प्रहरी कार्यालयबाट अनुसन्धान टोली आउन लागेको जानकारी दिनुभयो । कुकुरसहितको टोली आउन लागेकोले शव चलाईएको छैन । अहिले होटेलमा प्रहरीले सुरक्षा दिइरहेको छ । 

सम्बन्धित समाचार ......