तिमीलेमा नगर बस पुग्दा स्थानीय खुशि

रुकुम पश्चिम । रुकुम पश्चिमको चौरजहारी नगरपालिकाले वडा नम्वर १४ सम्म नगर बस सेवा बिस्तार गरेको छ । सोमबार वडा नम्वर १४ को तिमिलेमा पहिलोपटक नगर बस पुग्दा स्थानीयवासी खुशि भएका छन् ।

तिमिले गाँउको रागेचौरमा कर्णाली प्रदेश ०२-००१ ख ०१७९ नम्बरको नगरबस चौरजहारी बस पार्कदेखि कोटजहारी जोगिनेटा हुँदै तिमीले रागेचौरमा बस पुगेको हो। अघिल्लो स्थानीय सरकारका जनप्रतिनिधिहरुको कार्यकालमा पुग्ने भनिएको नगर बस यस पटक गाउँका पुगेपछि सम्पूर्ण गाउँवासी खुशि भएको स्थानीय अगुवा भिमबहादुर केसीले जानकारी दिनुभयो । 

साँघुरो सडकको कारण जान नसकेको बस यसपटक नगरपालिकाको डोजरले बिस्तार गरेपछि तिमिले बस जान सजिलो भएको हो । नगर प्रमुख पुष्प बादीले गाउँका सर्वसाधारणहरुको सेवाका लागि स्थानीय सरकारले काम गरिरहेको बताउनुभयो । दुरदराजमा रहेका नगरबासीलाई सधैं सेवा दिने प्रतिबद्धता समेत उहाँले राख्नुभयो । 

गाउँमा बस पुग्दा स्थानीय ७१ बर्षिय एकबहादुर ओली छमछमीले असाध्यै खुशि भएको बताउनुभयो । उहाँले गाउँ विकास भएको आफ्नै पालामा देख्न पाएको उल्लेख गर्नुभयो । अब नगरपालिका, अस्पताल, बजार जानलाई सहज हुने बताउनुभयो ।  

गाउँमा गाडि पुगेपछि गाडी चालक जितबहादुर बुढाथोकी लगायतलाई स्थानीयले फूलमालाले स्वागत गरेका छन् । स्वागत कार्यक्रमा वडन नम्वर १४ का पूर्व अध्यक्ष अतिराम बिष्ट, वडा नम्वर ११ का वडा सदस्य केवल ओली, सानीभेरी गाउँपालिका वडा नम्वर १० का महिला सदस्य सीता डाँगी खड्का लगाएत स्थानीयको उपस्थिति रहेको थियो । 

अब तिमिलेबाट सानीभेरी गाउँपालिका ८ को माथिल्लो लेक, आमडाँडा विप्पे ,सानीभेरी गाउँपालिका १० को चिन्तु, झारपोखरी, अमलाटाकुरा, घण्ठाना, दाब्रेखोला र चौरजहारी नगरपालिका १४ को कुमाख, बञ्चरे, तिमीलेबाट चौरजहारी आउजाउ गर्न सजिलो हुने स्थानीयको बिश्वास रहेको छ । नगरबस सञ्चालनमा नियमितताको गाउँवासीले माग गरेका छन् । 

नगरबस बिदाको दिन बाहेक दैनिक बिहान ७ बजे  तिमीलेबाट चौरजहारीसम्म छुट्ने र बेलुका चौरजहारीबाट साढे दुई बजे फर्कने बताईएको छ ।