सोसल मिडिया
रुकुम पश्चिम । शुक्रबार जाजकोटको बारेकोट गाउँपालिका वडा नम्वर १ रामिडाँडा केन्द्रबिन्दु भएर गएको ६.४ रेक्टरस्केलको भूकम्पको कारण रुकुम पश्चिमको आविसकोट नगरपालिका क्षेत्रमा ४२ जनाको मृत्यु भएको छ ।
नगरपालिकामा ठुलो मात्रामा जनधनको क्षति भएकोले आज आठविसकोट नगरपालिकामा शोक बिदा दिईएको छ । मानवीय र भौतिक संरचनामा पनि ठुलो क्षतिपछि शोकमा डुबेको नगरपालिकाले जनाएको छ ।
नगर प्रमुख रबि केसीले शनिवार कार्यपालिका बैठक गरेर शोक बिदा सहित अन्य निर्णय गरेको जानकारी दिनुभयो । उहाँका अनुसार नगरपालिकाका कार्यालयहरूमा राष्ट्रिय झन्डा आधा झुकाइने, नगरपालिकामा कार्यरत शिक्षक, कर्मचारी र जनप्रतिनिधिले एक एक महिनाको तलब नगरपालिकाको प्रकोप व्यवस्थापन कोषमा जम्मा गर्ने निर्णय समेत भएको छ ।
त्यसैगरी तत्कालका लागि मृत्यु भएका परिवारलाई २५ हजार दरले क्रिया खर्च उपलब्ध गराउने निर्णय कार्यपालिका बैठकले गरेको छ ।
भूकम्प पीडितको राहत तथा पुनस्र्थापनाका लागि बैठकले उप प्रमुख धनकुमारी शाहीको संयोजकत्वमा ११ सदस्यीय विपद् क्षति लगत सङ्कलन मूल्याङ्कन समिति गठन गरेको छ भने सहयोगका लागि विभिन्न दातृ निकाय, संद्धसंस्थालाई अपिल समेत गरेको छ ।
नगरपालिकाले आजदेखि राहत वितरणको कामलाई सुरु गर्ने जनाएको छ ।
