सोसल मिडिया
रुकुम पश्चिम । भूकम्पबाट बढी प्रभावित रुकुम पश्चिमको आठविसकोट नगरपालिका र सानीभेरी गाउँपालिकाका पीडित तथा प्रभावितहरुलाई लागि नेपाल रेडक्रस सोसाइटी रुकुम पश्चिम शाखाले राहत सामाग्री उपलब्ध गराएको छ ।
रेडक्रसले आठविसकोट नगरपालिकाका तीन सय र सानीभेरी गाउँपालिकाका तीन सय गरेर ६ सय परिवारको लागि तत्काल आवश्यक सामाग्री स्थानीय सरकारलाई उपलब्ध गराएको शाखाका सभापति रमा गौतमले जानकारी दिनुभयो ।
उहाँका अनुसार त्रिपाल, डोरी, म्याट्रेस, कम्बल लगायतका सामाग्री सम्बन्धित पालिकामै पुगेर आईतबार साँझ हस्तान्तरण गरिएको हो । सभापति गौतमका अनुसार स्थानीय सरकारलाई हन्तान्तरण गरिएका ती सामाग्रीहरु वितरण समेत सुरु गरिएको छ ।
‘राहत सामाग्री धमाधम पीडितहरुलाई उपलब्ध गराउन थालिएको छ,’ गौतमले भन्नुभयो, ‘रेडक्रसकर्मीहरु पनि प्रत्यक्ष रुपमा राहत वितरणमा स्थानीय सरकारको साथमै हुनुहुन्छ ।’
जिल्ला शाखा र उपशाखा समेतका गरेर २० जना रेडक्रसकर्मीहरु जिल्लाको विभिन्न स्थानमा रहेका भूकम्प पीडितहरुलाई राहत उपलब्ध गराउने काममा खटिएको बताईएको छ । यसका साथै केन्द्रीय कार्यालयबाट समेत उद्धार तथा राहतको लागि टोली जिल्लामा आई पुगेको छ ।
