रुकुम पश्चिमको सानीभेरी गाउँपालिका –४ चाख्लिमेलामा घडेरी बनाउने काममा बुवासँगै जानुभएका २७ वर्षिय पूर्ण प्रकाश ओलीलाई छोरा प्रणवले तारन्तार फोन गरेर बाबा छिटो आउनु भनिरहे । बुवा मुगे ओलीलाई त्यहि छोडेर जाजरकोटको भेरि नगरपालिका –१ रिम्ना बजार आउनुभएका पूर्ण त्यहि रात (गत शुक्रबार) छोरा प्रणवसँगै अस्ताउनुभयो । 

‘घडेरी खन्न गएका बुवालाई छोराले बाबा सुन्तला ल्याएर आउनु है भन्दै घरीघरी फोन गरिरहेको थियो,‘ मृतक पूर्णकी श्रीमती मायाले भन्नुभयो, ‘बुवासँगै संसार छोड्नलाई रैछ, मेरो त अब संसार उजाडियो ।’

रिम्ना बजारमा व्यवसाय गर्दै आउनुभएका ओलीको २६ वर्षिया श्रीमती माया घर्ती ओली, पाँच बर्षिया छोरा प्रणव, एक बर्ष नपुगेकी सानी छोरीको साथमा बस्दै आउनुभएको थियो । कहिलेकाँहि सानीभेरी गाउँपालिका –४ बाट बुवाआमा पनि आएर बस्नुहुन्थ्यो । 

मायाका अनुसार ससुरा वुवा त्यसदिन चाख्लिमेलामै बस्नुभयो । यता सासुआमा, म, छोरा र सानी मात्रै थियौ । उहाँ आएपछि खाना खाएर सासुआमा एउटा कोठामा सुत्नुभयो, हामी अर्को कोठामा सुत्यौ । राती एक्कासी घर उचाल्ने गरेर भूकम्प आयो ।

काखमा सुतेकी छोरीलाई च्यापेर म हुत्तिएर घर बाहिर निस्किए । आधा शरिर च्यापिएकी छोरीलाई जबरजस्ति तानेर म बाहिर निस्किएकी हुँ । मेरो श्रीमान् र छोरा पनि निस्किए होलान् लागेको थियो । तर, सुतेको ठाउँबाट हलचल गर्न नपाई संसार त्याग्नुभएछ । 

बाहिरको कोलाहल, अध्यारो अनि घर भत्किएको धुँलोले केहि ठम्याउन सक्ने अवस्था थिए । म बाटोमा बिचेत अवस्थामा छोरी च्यापेर बसेकी थिए । नेपाल प्रहरीको टोली आईपुग्यो । बाबुछोरालाई एउटै बिस्तरामा मृत अवस्थामा भेटायो । सासुआमालाई भने करिब डेढ घण्टापछि जीवितै उद्धार गर्यो । उहाँ पनि बाँच्न सफल हुनुभयो । 

पूर्णले रिम्ना बजारमा फोटो स्टुडियो र होटेल समेत सञ्चालन गर्नुभएको थियो ।  सबैतिर विदेश जाने लहर चलिरहेको बेला उहाँले पनि खाडिमुलक जानलाई दलाललाई पासपोर्ट बुझाउनु भएको थियो । मायाले आँशु खसाल्दै भन्नुभयो, “मलेसिया जाने भिसा लगाउनुभएको थियो, भिसा भन्दा पहिलो यो भूकम्प काल बनेर आयो ।” 

बैदेशिक रोजगारीमा जानलाई उहाँले सुरुमा एउटा दलाललाई पचास हजार रुपियाँ दिनुभएको थियो । त्यसले न बिदेश पठायो, न त पैसा फिर्ता दियो । ऋण गरेर निकालेरको त्यो पैसाको ब्याज तिरिरहेको मायाले सुनाउनुभयो । 

भूकम्पले श्रीमान् र छोरासँगै बर्षौ व्यापार गरेर बनाउन सकेको घर ढलाएको छ  । घरसँगै दुबै पसल ध्वस्त भएका छन् ।

त्रिपालमूनी एक बर्षे छोरीको साथमा बसिरहेकी मायालाई अब त्यहि छोरीको भविष्यको चिन्ता छ । उहाँले भन्नुभयो, “बरु सरकारले शितपनि नरोक्ने यस्तो त्रिपाल नदेओस्, मेरो छोरीको भविष्य हेरिदेओस् । दुई दिन भोकै बसुँला तर अब मेरो यहि साहारा गुमाउन नपरोस् ।”