सोसल मिडिया
रुकुम पश्चिम । रुकुम पश्चिममा सोमबार बिहान जिप दुर्घटना हुँदा दुई जनाको मृत्यु भएको छ भने १९ जना घाईते हुनुभएको छ ।
चौरजहारी नगरपालिका –१० को खोलागाउँबाट जिल्ला सदरमुकाम मुसीकोट खलङगातर्फ आउँदै गरेको लु १ ज २२९७ नम्वरको यात्रुवहाक जिप मध्यपहाडि राजमार्ग अन्तर्गत चौरजहारी नगरपालिका –८ को गोईरीज्यूलामा दुर्घटना भएको हो ।
दुर्घटनामा परेर गम्भिर घाईते हुनुभएका चौरजहारी नगरपालिका –१३ का ४५ बर्षिय मस्त बहादुर ओली र सानीभेरी गाउँपालिका –२ निवासी सपना बुढाका १७ महिनाका छोरा प्रतिक बुढाको मृत्यु भएको प्रहरीले जनाएको छ । उपचारको लागि चौरजहारी अस्पतालमा पुर्याईएका ओलीलाई चौरजहारी अस्पताल र बुढालाई कर्णाली प्रदेश अस्पताल सुर्खेतले मृत घोषणा गरेको हो ।
जिल्ला प्रहरी कार्यालय रुकुमपश्चिमका प्रहरी नायब उपरिक्षक नमराज भट्टराईका अनुसार दुर्घटनामा परेर थप १९ जना घाईते हुनुभएको छ । घाईतेमध्य गम्भिर अवस्थामा रहेका १० जनालाई थप उपचारको लागि जिल्ला बाहिर लगिएको छ ।
गम्भिर अवस्था रहेका चौरजहारी नगरपालिका –१३ निवासी ३७ वर्षिय जिप चालक भिमबहादुर बिक र ४ बर्षिया साहारा परियार, वडा नम्वर ११ निवासी ३० वर्षिय रणबहादुर ओली, वडा नम्वर १४ निवासी २४ वर्षिय प्रेम परियार र २६ वर्षिय कविता परियार र वडा नम्वर १० निवासी २५ वर्षिय प्रविर पुनलाई उपचारको लागि मेडिकल कलेज कोहलपुर लगिएको छ । उहाँहरुलाई हेलिकप्टर मार्फत थप उपचारको लागि त्यहाँ लिईएको हो ।
त्यसैगरी चौरजहारी नगरपालिका –१३ निवासी ४ बर्षिया डिला बिष्ट, सानीभेरी गाउँपालिका वडा नम्वर २ निवासी २० वर्षिया सीता पुन, २८ वर्षिया सिता बिष्ट र ८ बर्षिया दिपशिखा पुनलाई थप उपचारको लागि कर्णाली प्रदेश अस्पताल सुर्खेत लगिएको छ । अन्य नौ जना घाईतेहरुको भने चौरजहारी अस्पतालमा उपचार भईरहेको प्रहरीले जनाएको छ ।
क्षमता भन्दा बढी यात्रु बोकेको उक्त जिप अनियन्त्रित हुँदा करिब तीन सय मिटर तल सानोभरी किनारमा खसेको बताईएको छ । १२ जना यात्रु बोक्ने अनुमति रहेको उक्त जिपमा चालक सहित २१ जना यात्रु रहेको प्रहरीको भनाई छ ।
