सोसल मिडिया
रुकुम पश्चिम । भूकम्पको कारण रुकुम पश्चिम र जाजरकोटका ग्रामिण सडक र मध्यपहाडि राजमार्गका विभिन्न स्थानहरु भासिएका र चिरा परेका छन् । ती सडकखडण्डमा अहिले दुर्घटनाको जोखिम बढेको बताईन्छ ।
मध्यपहाडि राजमार्ग अन्तर्गत रुकुम पश्चिम खण्डको चौरजहारी देखि मुसीकोटसम्मको क्षेत्रमा दर्जन बढी स्थानमा सडक चिरा परेको छ । राजमार्गको विभिन्न स्थानको छेउको भाग बढीमात्रामा भासिएको छ भने बिचबिचको भाग चर्किएको छ ।
चौरजहारी नगरपालिका –१ का सागर आचार्यले चिरा परेको सडकखण्डमा मोटरसाईकल चलाएर जाँदा डर लाग्ने गरेको बताउनुभयो । उहाँले जिल्ला सदरमुकाम मुसीकोट जानेआउने क्रममा विभिन्न भागमा सडक चिरा परेकोले दुर्घटनाको जोखिम बढेको जनाउनुभयो ।
गाडि चालक खड्क बहादुर रानाले ठाउँ ठाउँमा भूकम्पको कारण सडक नै चिरा परेकोले दुर्घटनाको जोखिम रहेको उल्लेख गर्नुभयो । चिरा परेको सडकको भाग हरेक दिन भासिदै गएको समेत उहाँले जानकारी दिनुभयो । भूकम्पले क्षति गरेको सडकहरु मर्मत तथा सुधार गर्न आवश्यक रहेको समेत रानाले बताउनुभयो ।
यस बिषयमा मध्यपहाडि राजमार्ग आयोजना कार्यालय दैलेखका प्रमुख कुशलता न्यौपानेले क्षति भएको राजमार्गको विवरण संकलन भईरहेको बताउनुभयो । उहाँले ईन्जिनियरसहितको टोली फिल्डमै रहेकोले क्षतिको यथार्थ विवरण चाँडै आउने र समस्या समाधानका लागि लागिपर्ने जानकारी दिनुभयो ।
राजमार्ग अन्तर्गतको केहि क्षेत्रमा आफै पुगेर भासिएको, चिरा परेको र पहिरो आएको क्षेत्रको अनुगमन गरेको र अन्य स्थानको क्षतिको विवरण संकलन हुँदै गरेको न्यौपानेले जनाउनुभयो ।
ठेकेदारले हस्तान्तरण गरिसकेको सडकखण्डहरुमा क्षति भएकोले मर्मत तथा सुरक्षाको लागि बजेटमा समस्या भईरहेको समेत योजना कार्यालयले जनाएको छ । कार्यालय प्रमुख न्यौपानेले यो समस्या समाधानको लागि सडक डिभिजन कार्यालयसँग समन्वय भईरहेको बताउनुभयो । क्षतिको विवरण चाँडै नै तयार गरेर आवश्यक वजेट व्यवस्थापनका लागि लागिपर्ने उहाँको भनाई छ ।
भूकम्पको कारण पहिरो आएर अवरुद्ध भएका ग्रामिण सडकहरु भने जिल्ला विपद् व्यवस्थापन समिति र स्थानीय सरकारको समन्वयमा सुचारु गरिएको बताईएको छ । चिरा परेका र भासिएका ग्रामिण सडकहरुको विवरण संकलन गरेर मर्मत तथा निर्माणको लागि सम्बन्धित निकायलाई पत्राचार गरिने प्रमुख जिल्ला अधिकारी हरि प्रसाद पन्तले बताउनुभयो ।
भूकम्पको कारण रुकुम पश्चिममा मात्र ५३ जनाको मृत्यु भएको थियो । हजारौ घरबासविहिन सर्वसाधारणहरु अहिले टेन्ट र त्रिपालमा बसिरहेका छन् । भूकम्पले गरेको व्यक्तिगत तथा सार्वजनिक स्थानको क्षतिको पुरा विवरण स्थलगत रुपमै संकलन भईरहेको प्रमुख जिल्ला अधिकारी पन्तले जानकारी दिनुभयो ।
