सोसल मिडिया
रुकुम पश्चिम । शनिबार बेलुका सञ्चार तथा सूचना प्रविधिमन्त्री रेखा शर्मा भूकम्प प्रभावित जिल्ला रुकुम पश्चिम आईपुग्नुभएको छ । भूकम्प प्रभावित क्षेत्रका संचारकर्मी, सञ्चारमाध्याम र दुरसञ्चारको अवस्था निरीक्षणको क्रममा उहाँ रुकुम पश्चिम आईपुग्नुभएको हो ।
भूकम्पले दिएको पीडामा थोरै भएपनि मल्हम लगाउन मन्त्री शर्मा जिल्ला आउनुभएको हो । मन्त्री शर्माका प्रेस विज्ञ नरेन्द्र केसीका अनुसार यस क्रममा उहाँले आफ्नै पहलमा संकलित न्यानो कपडा (सिरक) जिल्ला विपद् व्यवस्थापन समितिलाई हस्तान्तरण गर्नुभएको छ ।
समितिका अध्यक्ष एवम् प्रमुख जिल्ला अधिकारी हरि प्रसाद पन्तलाई पाँच सय थान सिरक हस्तान्तरण गर्नुभएको प्रेस विज्ञ केसीले जानकारी दिनुभयो । चिसोको बेला भूकम्प प्रभावितहरुलाई राहत प्रदान गर्नको लागि सिरक उपलब्ध गराईएको हो ।
मन्त्री शर्माले मुसीकोट नगरपालिका –५ सेरिगाउँमा रहेको सहिद पार्कमा पुष्पगुच्छा चढाएर रुकुमपश्चिम प्रवेश गर्नुभएको हो । उहाँले कम्युनिष्ट आन्दोलनका पहिलो सहिद कामी बुढा, रुकुमका पहिलो कम्युनिष्ट सदस्य स्कन्द शर्मा तथा जनयुद्धका सहिदहरुको स्मृतिमा निर्मित सहिद पार्कमा पुष्पगुच्छा अर्पण गर्नुभएको हो ।
आज दिनभर रुकुम पश्चिम र जाजरकोटका भूकम्प पीडितहरुसँग भेट गर्ने, आम सञ्चार र दूरसञ्चारको क्षेत्रमा देखिएका समस्याहरु अनुगमन गर्ने कार्यक्रम रहेको बताईएको छ ।
