सोसल मिडिया
रुकुम पश्चिम । आठबिसकोट नगरपालिका भित्रका सबै भूकम्प पीडितहरुलाई अस्थायी आवास बनाउने काम तिब्र रुपमा भईरहेको छ । नगर प्रमुख रबि केसीले त्रिपाल र टेन्टको सहायतामा बसिरहेका सबै भूकम्प पीडितहरुलाई मंसिर महिना भित्रै छानामूनि ल्याउने बताउनुभएको छ ।
नगरपालिकाका अनुसार १४ वटै वडामा भूकम्पले करिब १० हजार घरमा क्षति पुगेको छ । नगरपालिकामा हालै संकलन गरेको तथ्यांक अनुसार अस्थायी आवास निर्माणका लागि नौ हजार ९६२ लाभग्राहिको विवरण संकलन भएको छ । लाभग्राहि परिचान गरेर जिल्ला विपद् व्यव्स्थापन समितिमा सिफारिस गरिएको नगर प्रमुख केसीले बताउनुभयो ।
उहाँका अनुसार अव सोही आधारमा पहिचान भएका लाभग्राहीहरूले अस्थायी आवास निर्माणको लागि रकम पाउने छन् । जिल्ला विपत् व्यवस्थापन समितिबाट नगरपालिकामा अस्थायी आवास निर्माण गर्न साढे चार हजार लाभग्राहीहरूको लागि पहिलो किस्ता बापतको २५ हजारका दरले ११ करोड २५ लाख रकम गइसकेको छ । बाँकी पाँच हजार चार सय ६२ लाभग्राहीलाई भने पहिलो किस्ता बापतको रकम आउन बाँकी रहेको प्रमुखले केसीले जानकारी दिनुभयो ।
नगरपालिकामा कति अस्थायी आवास बने र कति बन्न बाँकी छन् त्यसको भने अझै विवरण सङ्कलन भएको छैन । विभिन्न राजनीतिक दलहरूले स्वयंसेवाको रूपमा अस्थायी आवास निर्माण गरिरहनु भएको छ । केही निर्माण सम्पन्न भएर पनि अस्थायी आवासमा बसिसक्नु भएको छ ।
केही भूकम्प पीडित अस्थायी आवासमा बसे पनि धेरै भूकम्प पीडित अस्थायी आवास नबन्दा त्रिपालमै बसेका छन् । प्रभावित क्षेत्रमा अस्थायी आवास प्राय ठाउँमा बनिसकेका र केही ठाउँमा निर्माणको अन्तिम चरणमा रहेकाले मङ्सिर महिनाभित्र भूकम्पपीडित नगरवासीहरुलाई छानामुनि ल्याउने गरी लागि परेको नगर प्रमुख केसीले बताउनुभयो ।
