सोसल मिडिया
रुकुम पश्चिम । भूकम्पबाट घर क्षति भएपछि त्रिपालमा बस्दै आएका भूकम्प पीडितहरुको लागि पत्रकार महासंघ रुकुम पश्चिमले ३ वटा अस्थायी आवास निर्माण गरेको छ ।
विभिन्न राजनीतिक दल तथा निकायहरुले अस्थायी आवास निर्माणमा स्वयम् सेवक परिचालन गरिहेको बेला पत्रकार महासंघले पनि स्वयम् सेवक परिचालन गरेर अस्थायी टहरा निर्माण गरेको हो ।
महासंघका जिल्ला अध्यक्ष लक्ष्मण केसीका अनुसार आठविसकोट नगरपालिका ११ को रिठा गाउँमा अस्थायी आवास बनाएर पीडितलाई हस्तान्तरण गरिएको हो ।
रिठा गाउँका दिपेन्द्र मल्ल, अतिराम शाही र घमण्ड बहादुर चन्दको अस्थायी आवास निर्माण गरेर हस्तान्तरण गरिएको हो । भूकम्पले निम्त्याएको विपदलाई नजिकैबाट नियालिरहेको पत्रकारहरुले सहि खबर मात्र हैन पीडामा साथ दिन तयार रहन्छन् भन्ने गतिलो उदाहरण रुकुम पश्चिमका पत्रकारहरुले देखाएका छन् ।
अध्यक्ष केसीले शनिबार २२ जना पत्रकारहरु ३ टिममा परिचालन भएर अस्थायी आवास निर्माण गरेको उल्लेख गर्नुभयो ।
विपद्को बेला विभिन्न क्षेत्र र निकायका व्यक्तिहरुले हातेमालो गर्न आवश्यक रहेकोले पत्रकारहरुले अस्थायी आवास बनाउन थालेको उहाँको भनाई छ ।
त्रिपालमा रहेका भूकम्प प्रभावितहरुमा स्वास्थ्य समस्या आउन थालेको बताउनुहुँदै अध्यक्ष केसी सरकारले समेत सुरु गरेको अस्थायी आवास निर्माणको काममा पत्रकारहरु स्वयम् सेवक भएर सेवा गरेको बताउनुभयो ।
