सोसल मिडिया
रुकुम पश्चिम । रुकुम पश्चिमको चौरजहारीमा भूकम्प प्रतिरोधी एकिकृत नमूना बस्ती निर्माण सुरु भएको छ ।
चौरजहारी नगरपालिका वडा नम्वर १२ को टाकुरीटोलमा २१ वटा घर निर्माणको थालनी गरिएको हो । नगर प्रमुख पुष्प बादीले एक कार्यक्रमका बिच भूकम्प प्रतिरोधी एकिकृत नमूना बस्ती निर्माण कार्यको शिलान्यास गर्नुभएको हो ।
नगरपालिकाका पूर्व नगर प्रमुख बिशाल शर्माले चिसोको कारण भूकम्पपीडितहरुको स्वास्थ्य थप जोखिममा पर्न थालेकोले एकिकृत रुपमा नमूनाबस्ती निर्माण थालिएको जानकारी दिनुभयो ।
उहाँका अनुसार एकिकृत बस्ती निर्माणका लागि पीडित परिवार र मानव विकास तथा सामुदायिक सेवाको संयुक्त लगानी रहने छ । दुई पक्षले एक घर निर्माणको लागि करिब पाँच/पाँच लाख रुपियाँको लगानी गर्ने सहमति भएको शर्माले बताउनुभयो ।
भूकम्पपीडित गणेश खत्रीले सिङगो टोलका २१ घर एकसाथ बनाउन थालेको बताउनुभयो । एक घरको लम्बाई सात मिटर र चौडाई ५.५ मिटर रहने गरी काम थालनी भएको छ । सबै घरमा समान प्रकृतिको बरण्डा समेत रहने खत्रीले उल्लेख गर्नुभयो ।
अहिले संयुक्त रुपमा स्थानीयवासीहरुले घर निर्माणको काम गरिरहेको र एक घर निर्माणसँगै अर्को घर सुरु गर्ने सहमति भएको समेत खत्रीले जनाउनुभयो ।
वडा नम्वर १२ का वडा अध्यक्ष टिकाराम ओलीले तीन महिनाभित्र पहिलो चरणको एकिकृत बस्ती निर्माण कार्य सक्ने गरेर काम थालनी गरेको बताउनुभयो । आफ्नो वडाका पाँच सय ९२ घरको टहरा निर्माण सकिएकोले पुनर्निर्माणको अभियान सुरु गरिएको उहाँको भनाई छ ।
वडाध्यक्ष ओलीले नगरपालिकाको दुर्गम बस्तीको रुपमा रहेको टाकुराटोलमा नमूना बस्ती विकास गरेर उदाहरणिय कार्य प्रस्तुत गरिने उल्लेख गर्नुभयो । घर निर्माणमा सम्पूर्ण टोलवासीहरु एक भएर काम गरिरहेका छन् ।
चौरजहारी नगरपालिका भित्र सात हजार दुई सय ३६ घरपरिवारका आठ हजार दुई सय ७० वटा घर क्षति भएको नगर प्रवक्ता खुमबहादुर खड्काले जानकारी दिनुभयो । जसमध्य चार सय ५५ वटा पूर्ण रुपमा, छ हजार पाँच सय ९१ वटा आंशिक रुपमा र एक हजार दुई सय २४ वटा सामान्य चर्केर क्षति भएका छन् ।
