सोसल मिडिया
शनिबार रुकुम पश्चिमको जिल्ला सदरमुकाम मुसिकोटमा कृषि मेला प्रदर्शनी कार्यक्रम सम्पन्न भएको छ ।
कृषि विकास कार्यालय र मुसिकोट नगरपालिका कृषि शाखाको संयुक्त आयोजनामा मुसीकोट नगरपालिका १ बाल मन्दिरमा भएको कृषि मेला प्रदर्शनीमा २४ जना किसानलाई पुरस्कृत गरिएको छ । नगरपालिकास्तरिय कृषि मेलामा कृषि उपज प्रदर्शनी गर्ने उत्कृष्ट किसानलाई पुरस्कृत गरिएको हो ।
कृषि विकास कार्यालयका निमित्त प्रमुख मिन बहादुर केसीका अनुसार मेलामा नगरपालिकाका क्षेत्रका दुई सय किसानको सहभागिता रहेको थियो भने प्रदर्शनीमा राखिएका कृषि उपजलाई मूल्याङकन गरी २४ जना किसानलाई पुरस्कृत गरिएको छ ।
विभिन्न ६ वटा विधामा रहेर कृषि उपजको मूल्यांकन गरिएको हो । निमित्त प्रमुख केसीले तरकारी बाली समूहतर्फ वडा नम्बर १३ का तुलवीर खत्री प्रथम, वडा नम्बर ४ का अमरबहादुर घर्ती द्वितिय, वडा नम्बर ३ का नारायण खड्का तृतीय र वडा नम्बर ५ की कौशिला पाण्डे केसीले सान्त्वना स्थान प्राप्त गरेको बताउनुभयो ।
फलफूल बाली समूहतर्फ वडा नम्वर २ को फेडरल इन्भेस्टमेन्ट प्रा.लि. प्रथम, वडा नम्बर ५ का देवराम देवकोटा द्वितिय, वडा नम्वर ८ का लोकेन्द्र ओली तृतीय र वडा नम्वर ४ का दलबहादुर बोहरा सान्त्वना हुनुभएको छ ।
दलहन तथा तेलहन बाली समूहतर्फ वडा नम्बर १३ का दीपक रोकाय प्रथम, वडा नम्बर १ की सुमित्रा महतारा द्वितिय, वडा नम्बर ८ का दिलबहादुर गिरी तृतीय र वडा नम्वर २ का मोहनलाल खत्री सान्त्वना हुनुभएको छ । विविध तथा रैथाने बाली समूहतर्फ वडा नम्बर १ का रकवीर बोहरा प्रथम, वडा नम्बर १ कै कमला खड्का द्वितिय, वडा नम्बर ७ का वीरबहादुर घर्ती तृतीय र वडा नम्बर ३ की नन्दकला डाँगी सान्त्वना भएको कार्यालयले जनाएको छ ।
प्रदर्शनीमा खाद्यान्न बाली समूहतर्फ वडा नम्बर ३ का सोविराम खत्री प्रथम, वडा नम्बर ७ का भिमप्रकाश पाण्डे द्वितिय, वडा नम्बर १३ का ज्ञानबहादुर ओली तृतीय र वडा नम्बर १ का कालीबहादुर महतारा सान्त्वना हुनुभएको छ भने मसला तथा नगदे बाली समूहतर्फ वडा नम्बर १४ की भिमा ओली प्रथम, वडा नम्बर ८ का वासुदेव बुढा द्वितिय, वडा नम्बर ४ का खड्कबहादुर रेउले तृतीय र वडा नम्बर ५ का ओमप्रकाश केसी सान्त्वना हुनुभएको छ ।
पुरस्कृत किसानहरुलाई समान रूपमा नगद पुरस्कार दिईएको निमित्त प्रमुख केसीले जनाउनुभयो । उहाँका अनुसार प्रथमलाई दुई हजार, द्वितियलाई एक हजार पाँच सय, तृतीयलाई एक हजार र सान्त्वनालाई सात सय रुपियाँ पुरस्कार प्रदान गरिएको हो ।
मेलामा सहभागी भएका अन्य १६ जना किसानहरुलाई समेत १६ जना किसानलाई पाँच/पाँच सय रुपियाँ यातायात खर्च दिइएको थियो ।
