सोसल मिडिया
रुकुम पश्चिममा भूकम्पपीडित परिवारहरुका १४ हजार अस्थायी आवास निर्माण भएका छन् । सरकारले उपलब्ध गराएको अनुदान रकमबाट जिल्लामा हालसम्म १४ हजार छ वटा अस्थायी आवास निर्माण भएका हुन् ।
जिल्ला प्रशासन कार्यालयका अनुसार आठ हजार २७ वटा आवास निर्माणकै क्रममा रहेका छन् । प्रमुख जिल्ला अधिकारी हरि प्रसाद पन्तले हालसम्म आठबीसकोट नगरपालिकामा पाँच हजार तीन सय ८४ वटा अस्थायी आवास निर्माण भएको र दुई हजार पाँच सय ६५ आवास निर्माणको चरणमा रहेको जनाउनुभयो ।
चौरजहारी नगरपालिकामा दुई हजार पाँच सय १३ अस्थायी आवास निर्माण भएका छन् भने तीन हजार दुई सय ३१ वटा निर्माण भइरहेका छन् । मुसीकोट नगरपालिकामा हालसम्म ७० वटा अस्थायी आवास निर्माण भएका छन् भने १२ वटा निर्माण भईरहेका छन् ।
त्यसैगरी सानीभेरी गाउँपालिकामा चार हजार चार सय ८२ वटा अस्थायी आवास निर्माण सम्पन्न भएको र एक हजार चार सय ३९ वटा निर्माण हुँदै गरेको प्रशासन कार्यालयले जनाएको छ । कार्यालयका अनुसार त्रिवेणी गाउँपालिकामा एक हजार चार सय ४० वटा अस्थायी आवास निर्माण भएका छन् भने सात सय ४० वटा आवास निर्माणको चरणमा छन् । बाँफिकोटमा गाउँपालिकामा एक सय १७ लाभग्राहीका लागि अस्थायी आवास निर्माण भएका छन् भने ४० वटा निर्माण भईरहेका छन् ।
भूकम्पपीडितहरूको अस्थायी आवास निर्माणको लागि हालसम्म ७० करोड ८९ लाख ५० हजार रुपियाँ निकाशा भईसकेको छ । जिल्ला प्रशासन कार्यालयका अनुसार जिल्ला विपद् कोषबाट जिल्लाका छ वटा स्थानीय तहमा रहेका स्थानीय विपद् कोषमा उक्त रकम पठाइएको हो । २८ हजार ४३ जना लाभग्राहीको लागि पठाईएको पहिलो किस्ता बापतको उक्त रकमबाट नै लाभग्राहीले अस्थायी आवास निर्माण गरेका हुन् ।
स्थानीय विपद् कोषबाट २२ हजार ६५ जना लाभग्राहीको खातामा ५५ करोड १६ लाख २५ हजार रुपियाँ जम्मा भईसकेको छ । जिल्लाभर तीस हजार बढी घरमा भूकम्पले क्षति गरेको बताईन्छ । स्थानीय तहबाट प्रहरी मुुचुल्कासहित लाभग्राही कायम गरेर अस्थायी आवासका लागि रकम माग गर्ने काम भईरहेको छ ।
