रुकुम पश्चिम ।   रुकुम पश्चिममा एक बालकको घाटी रेटेर हत्या गरिएको छ ।  जिल्लाको मुसिकोट नगरपालिका वडा नम्बर ११ मा अन्दाजी १४ वर्षीय निर्मल डाँगीको हत्या भएको छ ।  

रोल्पाको परिवर्तन गाउँपालिका ४ का डाँगीको मुसिकोट ११ निवासी ३२ वर्षीय चन्द्रबहादुर पुनले खुकुरीले घाटी रेटेर हत्या गरेको जिल्ला प्रहरी कार्यालय रुकुम पश्चिमका  प्रहरी नायब उपरीक्षक नमराज भट्टराईलेले जानकारी दिनुभयो ।  उहाँका अनुसार  खुकुरी प्रहारबाट मुसिकोट नगरपालिका ११ कै ४१ वर्षीय सुकलाल पुन घाइते भएका छन । 

घटना आज दिउँसो १२ बजेतिर भएको खुलेको छ ।  घाइते सुकलालको जिल्ला अस्पताल सल्लेमा उपचार भइरहेको छ । सुकलालको टाउकोमा खुकुरी प्रहारबाट चोट लागेको बताइएको छ । खुकुरी प्रहार गर्ने चन्द्रबहादुरलाई प्रहरीले नियन्त्रणमा लिएको र थप घटनाको बारेमा अनुसन्धान भइरहेको प्रहरी नायब उपरीक्षक भट्टराईले बताउनुभयो ।