सोसल मिडिया
रुकुम पश्चिमका २७ हजार बढी भूकम्प पीडितहरुको खातामा अस्थायी आवास निर्माणको लागि अनुदान रकम जम्मा गरिएको छ । जिल्लामा लाभग्राही कायम भएका करिब ३० हजार भूकम्पपीडितहरु मध्य २७ हजार ३६ जनाको खातामा पहिलो किस्ता वापतको रकम जम्मा गरिएको हो । जिल्ला विपद् जोखिम न्यूनीकरण तथा व्यवस्थापन कोषबाट स्थानीय विपद् जोखिम न्यूनीकरण तथा व्यवस्थापन कोषमा जम्मा गरिएको रकमबाट उक्त रकम लाभग्राहीलाई उपलब्ध गराईएको हो । स्थानीय तहले हालसम्म ६७ करोड ५९ लाख रुपियाँ लाभग्राहीलाई भुक्तानि गरेका छन् ।
सहायक प्रमुख जिल्ला अधिकारी प्रवेश बढुवालले चौरजहारी नगरपालिकाका छ हजार २५४ जना, आठविसकोट नगरपालिका नौ हजार ६६७, मुसीकोट नगरपालिकाका एक हजार ४०, सानीभेरी गाउँपालिकाका पाँच हजार ६२४, त्रिवेणी गाउँपालिकाका दुई हजार ७५२ र बाँफिकोट गाउँपालिकाका एक हजार ६९९ जना लाभग्राही खातामा पहिलो किस्ताको रकम जम्मा गरिसकेको जाउनुभयो । एक जना लाभग्रहीलाई २५ हजार रुपियाँका दरले पहिलो किस्ताको अनुदान रकम जम्मा गरिएको हो ।
सहायक प्रजिअ बढुवालले अस्थायी आवास निर्माणको लागि हालसम्म जिल्लाका छ वटा स्थानीय तहमा रहेका स्थानीय विपद् जोखिम न्यूनीकरण तथा व्यवस्थापन कोषमा ७३ करोड ५१ लाख ५० हजार रुपियाँ पठाईसकिएको बताउनुभयो । यो रकम २९ हजार ४०६ वटा अस्थायी आवास निर्माणका लागि निकाशा गरिएको हो ।
अनुदान रकमबाट हालसम्म जिल्लामा १८ हजार ८६६ वटा टहरा (अस्थायी आवास) निर्माण भएका छन् । भूकम्पको कारण क्षति भएका करिब ३० हजार घर मध्य १८ हजार बढी परिवारले टहरा निर्माण गरेका हुन् ।
