सोसल मिडिया
रुकुम पश्चिममा ड्युटिमा रहेका प्रहरीलाई कुटपिट गरी घाईते बनाएको आरोपमा प्रहरीले चार जनालाई पक्राउ गरेको छ ।
जिल्ला प्रहरी कार्यालयका सूचना अधिकारी प्रहरी निरीक्षक धर्मेन्द्र खड्काका अनुसार बाँफिकोट गाउँपालिका वडा नम्वर ४ का २८ वर्षिय लक्ष्मण बिक, सोहि वडाका २२ वर्षिय जनक खनाल, वडा नम्वर ५ का २२ वर्षिय कैलाश पुरी र वडा नम्वर ६ का एक १५ वर्षिय बालक रहेका छन् ।
उनीहरुलाई जिल्ला प्रहरी कार्यालयबाट सोमबार बिहान प्रहरी निरीक्षक खड्काको नेतृत्वमा गएको प्रहरी टोलीले नियन्त्रणमा लिएको हो । आईतबार बेलुका रुकुम पश्चिमकोे बाँफिकोट वडा नम्वर ३ स्यार्पुमा प्रहरी माथि आक्रमण भएको प्रहरीको भनाई छ ।
आक्रमणमा परेर ईलाका प्रहरी कार्यालय बाँफिकोटमा कार्यरत प्रहरी जवानद्वय महेन्द्र बहादुर शाही र हिमराज खड्का घाईते हुनुभएको थियो । आक्रमणमा परि घाईते भएका प्रहरी जवान शाहीको ढाडमा र खड्काको टाउकोमा चोट लागेको छ ।
उहाँहरुलाई उपचारका लागि आईतबार राती जिल्ला अस्पताल सल्ले ल्याईएको थियो । घाईतेहरुलाई थप उपचारका लागि कोहलपुर मेडिकल कलेजमा भर्ना गरिएको प्रहरी निरीक्षक खड्काले जानकारी दिनुभयो ।
प्रहरीका अनुसार स्थानीय युवाहरु विचमा विवाद भएको थियो । विवादपछि हो हल्ला गर्दै हिडेका युवाहरुलाई सम्झाई बुझाई गर्न खोज्दा केहि युवाहरुले उल्टै प्रहरी माथि आक्रमण गरेका थिए । युवाहरुले प्रहरी माथि हातपात गर्दै ढुङगा प्रहार गरेर घाईते बनाएको प्रहरीको भनाई छ ।
प्रहरी माथि हातपात तथा कुटपिट गर्ने अन्य व्यक्तिहरु फरार रहेको र उनीहरुको पनि खोज तलास भईरहेको प्रहरीको भनाई छ ।
सम्बन्धित समाचार ..... रुकुम पश्चिमको बाँफिकोटमा प्रहरी माथि कुटपिट, दुई प्रहरी गम्भिर घाईते
