सोसल मिडिया
रुकुम पश्चिमको मुसीकोट नगरपालिका –५ मा रहेको यमुनानन्द नमुना माध्यमिक विद्यालयका विद्यार्थीहरु यतिबेला परम्परागत दुना, टपरी बनाउने सीप सिक्न व्यस्त रहेका छन् ।
विद्यालयले पराम्परागत सीपलाई पुस्तान्तरण गर्न र संस्कारको रुपमा विकास गर्न दुना टपरी बनाउन सिकाउन थालेको हो । विद्यालयका प्रधानाध्यापक कमप्रसाद देवकोटाले व्यवहारिक रुपमा सीप सिकाउनको लागि पनि दुना टपरी बनाउन थालिएको बताउनुभयो । उहाँका अनुसार अहिले विद्यालयको कक्षा ६ देखि १० सम्मका ५० देखि ६० जना विद्यार्थीहरुले सालको पातको दुना र टपरी बनाउन सिकिरहेका छन् ।
विद्यालयका शिक्षिकाहरु प्रेमकला बाँठा, प्रज्वला पुन, सुशीला शर्मा, कल्पना ओली, ममता चन्द र शिक्षक विवेक शर्माले विद्यार्थीहरुलाई उक्त सीपको लागि सहजिकरण गरिरहनु भएको छ ।
सरस्वती पूजालाई प्राथमिकतामा राखेर विद्यार्थीहरुले अहिले दुना टपरी निर्माण गरिरहेका छन् । शिक्षिका प्रेमकला बाँठाले मुसीकोट नगरपालिका –४ बोरागाउँबाट विद्यार्थी र शिक्षक मिलेर सालको पात टिपेर ल्याउने र दुना टपरी बनाउने काम भईरहेको बताउनुभयो ।
उहाँका अनुसार बालबालिकाहरुलाई थप सीप सिकाउन पढाई नभएको बेला, खाजा समयको बेला उक्त सीप सिकाईएको छ । सरस्वती पूजाको अवसरमा विद्यालयमा पुजा विशेष र साँस्कृतिक कार्यक्रम राखिएको र आउने पाहुनालाई प्रसाद दिनको लागि विद्यार्थी बनाएका दुना टपरी नै प्रयोग गर्ने शिक्षिका बाँठाले उल्लेख गर्नुभयो । तीन दिनको अवधिमा एक हजार दुना टपरी निर्माण गरिएको विद्यालयले जनाएको छ ।
यस कार्यले फजुल खर्च नहुने र स्थानीय श्रोत साधनको उपयोग हुने छ । विद्यार्थीहरुमा बचत गर्ने बानीको विकास गर्न र सीप हस्तान्तरण गर्न गर्न पनि यो प्रयोगात्मक कार्य थालनी गरिएको हो ।
फोटोहरु सौजन्य : प्रेमकला बाँठा
