रुकुम पश्चिमको आठविसकोट नगरपालिकाको केन्द्र राडि बजारमा सडक कालोपत्रेको काम गरिरहेको निर्माण कम्पनीले सरकारबाट भुक्तानी नपाएको भन्दै काम छोड्ने चेतावनी दिएको छ । 

आठबिसकोट नगरपालिका –९ को बजार क्षेत्र, क्याम्पस रोड र पसाने सडक कालोपत्रे गर्ने जिम्मेवारी पाएको गोर्खा मंगलदिप जेभीले ८० प्रतिशत काम सम्पन्न गर्दा पनि भुक्तानी नपाएकोले काम छोड्ने जनाएको हो । पाँच महिनादेखि भुक्तानी नपाउँदा समस्यामा परेको र अबको १५ दिनभित्र सम्पन्न काम अनुसारको रकम भुक्तानी नभए निर्माणस्थलबाट फर्कने उक्त कम्पनीले जनाएको छ ।

कम्पनीका निर्देशक राज शाहीले सम्पन्न भएको कामको समयमै भुक्तानी नपाउँदा ठुलो समस्यामा झेलिरहेको बताउनुभयो । उहाँका अनुसार भुक्तानी नपाएका कारण पाँच महिनादेखि कार्यरत कर्मचारी र मजदुरलाई पारिश्रमिकसमेत दिन सकिएको छैन । मंगलदीपले उक्त साइडमा १५ जना कर्मचारी र ५० जना कामदार रहेको जनाएको छ ।

सरकारले पाँच महिनादेखि भुक्तानी नदिएपछि कार्यरत कर्मचारी, कामदारलाई पारिश्रमिक नदिँदा उनीहरू काम छोड्न बाध्य भएका छन् । संघीय सडक आयोजना कार्यालयसँग गत वैशाख महिनामा भएको सम्झौता अनुसार आगामी भदौ १४ सम्म काम सक्ने अवधि रहेको छ ।

सडक कालोपत्रे गर्नका लागि भ्याटसहित २० करोड ७९ लाख ४६ हजार रुपियाँमा सम्झौता भएको बताईन्छ । कम्पनीले अहिलेसम्म कामबापत छ करोड रुपियाँ मात्र पाएको छ भने काम करिब अन्तिम चरणमा पुगेको छ ।

कार्यप्रगतिको आधारमा भुक्तानी दिनुपर्नेमा सरकारले भुक्तानीमा झुलाईरहेको निर्माण कम्पनीको भनाई छ । अब काम अगाडि बढ्ने अवस्था नरहेको र १५ दिनभित्र कार्यप्रगतिअनुसार भुक्तानी नभए साइड छोड्ने तयारीमा रहेको कम्पनीका साइट इन्चार्ज सुर्य शाहीले बताउनुभयो । उहाँका अनुसार अब चार किलोमिटर सडक कालोपत्रे गर्न बाँकि रहेको छ ।

उक्त कामको सबै तयारी पुरा भइसकेको छ । काम अनुसारको रकम भुक्तानी नहुँदा घरभाडा र खाना खाएको समेत पैसा तिर्न नसक्ने अवस्था रहेको ईन्चार्ज शाहीले जनाउनुभयो । कार्य प्रगतिका आधारमा करिब पाँच करोड रुपियाँ बराबरको बिल नियामक निकायसँग पेस गरेको उहाँले बताउनुभयो । 

यस बिषयमा संघीय आयोजना कार्यान्वयन इकाई सुर्खेतका प्रमुख रामकृष्ण आचार्यले निर्माण व्यवसायीबाट प्राप्त बिल भरपाई अनुसार संघमा रकम माग गरेको बताउनुभयो । आचार्यले ८० प्रतिशत भौतिक प्रगती भईसकेकोले अब चाँडै नै झुत्तानी हुने जनाउनुभयो । चार किलोमिटर दुरीको सडक कालोपत्रे गर्नुपर्ने उक्त सडकखण्डमा नाली र ढल, ग्राबेल र ढलानको काम सम्पन्न भइसकेको उहाँले जानकारी दिनुभयो ।

आठविसकोट क्षेत्रको मुख्य सडक कालोपत्रेसँगै बसपार्क पनि निर्माण पनि भईरहेको छ । बसपार्कको करिब ९० प्रतिशत काम सम्पन्न भएपनि उक्त कामको समेत भुक्तानी नहुँदा निर्माण कम्पनीलाई थप समस्या पैदा भएको बताईन्छ ।