रुकुम पश्चिमको त्रिवेणी गाउँपालिका –१० मा अवैध रुपमा कटान गरिएको काठ बरामद गरिएको छ । डिभिजन वन कार्यालय रुकुम पश्चिमले अवैध रूपमा कटान गरिएको ९७ थान गोलिया र चिरान गरेको काठ बरामद गरेको जनाएको छ । 

डिभिजन कार्यालयका प्रमुख शेरबहादुर परियारका अनुसार ठुलाभिर भुम्के सामुदायिक वन क्षेत्रमा अवैध रूपमा कटान गरिएको सल्लो प्रजातिको काठ बरामद गरिएको हो । विभिन्न नाप तथा साइजका पाँच थान गोलिया र ९२ थान चिरान गरेर ९७ थान काठ बरामद गरिएको हो ।

सामुदायिक वन उपभोक्ता समूहलाई अटेरी गरी अनुमति बिनै काठ कटान गरेको सूचनाको आधारमा डिभिजन वन कार्यालयबाट खटिएर गएको टोलीले उक्त काठ फेला पारेको थियो । अवैध रुपमा काठ कटान कार्यमा संलग्न व्यक्तिहरूको खोजी भईरहेको बताईएको छ । 

कार्यालय प्रमुख परियारले बरामद गरिएको काठ सामुदायिक वन उपभोक्ता समूहलाई जिम्मा लगाइएको बताउनुभयो । वन क्षेत्रबाट अवैध काठ कटान, चोरी तथा निकासी भईरहेको सूचनाको आधारमा डिभिजन वन कार्यालयले कडाईका साथ निगरानी बढाएको जनाएको छ ।