सोसल मिडिया
काठमाडौँ । चरेस ओसारपसार मुद्दामा पक्राउ परेका जनमुक्ति सेनाका पूर्वकमाण्डर जीतमान पुन 'मार्सल' को मुद्दामा सर्वोच्च अदालतले परमादेश जारी गरेको छ । अदालतले बन्दी प्रत्यक्षीकरणको रिट खारेज गर्दै जिल्लाबाटै पुनः सुनुवाइ गर्न परमादेश जारी गरेको हो । यसअघि उनकी पत्नीले स्वच्छ सुनुवाइको मौका नदिएको, म्याद तामेल नभएको, पिताको नामसमेत फरक परेको कारण पुनः सुनुवाइ हुनुपर्ने भन्दै बन्दी प्रत्यक्षीकरणको रिट दर्ता गरेकी थिइन् । आइतबार न्यायाधीशद्वय कुमार रेग्मी र बालकृष्ण ढकालको इजलासले यस्तो आदेश गरेको हो । पूर्वी रुकुम घर भएका मार्सल काठमाडौँको मच्छेगाउँबाट गत माघमा पक्राउ परेका थिए । जिल्ला अदालत दाङबाट भएको फैसला कार्यान्वयनका लागी उनलाई पक्राउ गरिएको थियो । उनी विरुद्ध २ वर्ष ६ महिना कैद र २० हजार जरिवाना हुने फैसला भएको थियो । पक्राउपछि जिल्ला अदालत काठमाडौँको आदेशले उनलाई कारागार कार्यालय डिल्लीबजारमा थुनामा पठाइएको छ । २०७२ मा दाङ जिल्ला अदालतले लागु औषध चरेस ओसारपसार मुद्दा दोषी ठहर गरेर कैद र जरिवाना तोकेको थियो ।- रातोपाटी
