सोसल मिडिया
म तिम्रो काखमा लुट्पुटिएर हरेक दुखलाई भुलिरहेकी छु आनन्दको सास फेरिरहेकी छु तिमीसँग गहिरो सम्बन्ध गाँसेर तिम्रो अङ्गालोमा बाँधिएकी छु कति सुन्दर छौ तिमी ।
तिमीलाई नियालेर हेरिरहँदा तिम्रो छातीमा टाँसिएर सुनिरहेकी छु तिम्रा ढुकढुकिका कथाहरु मन मष्तिस्कमा तिमीलाई राखेर सोचिरहेकी छु एउटै कुरा म पनि स्वतन्त्र बिउ बनि तिम्रो आँगनभरि छरिएर उम्रिन पाए
प्रिय कर्णाली, तिमी आफु कर्णाली हुनुमा कतिको गर्व गर्छौ ? म त तिम्रो सन्तान हुन पाउँदा आफुलाई भाग्यशाली ठान्छु किन थाहा छ ? तिमी हजारौँ सम्भावना बोकेर मुस्कुराइरहेका छौ तिम्रो सभ्यता, संस्कृति, भेषभुषा, भाषाले धेरै आयामहरु उजागर गरेका छन् तिम्रो समृद्धिमा जल, जमिन, खनिज, जडिबुटिले महत्वपुर्ण हिस्साको रुपमा आफ्नो हक जताइरहेका छन् ।
तिम्रो आँगनमा मुठि रोपेर मुरि उब्जाउन सकिन्छ प्राकृतिक र साँस्कृतिक विविधतासँगै लाखौँ पर्यटन भित्र्याउन सक्ने क्षमता छ तिमिसँग परिपक्क छौ तिमी सबथोक छ तिमीसँग हर कुराले भरिपुर्ण छौ तिमी तिम्रो भौगोलिकतासँगै हरकुराहरु फराकिलो छ ।
अब एकचोटि ... अब एकचोटि तिमीभित्र राज्य गर्नेहरुको हृदयलाई पनि अलिकति फराकिलो बनाइदेउन जहाँ गरिब, दुखी, निमुखा जनताको कठिनपूर्ण र सङ्घर्षशील जीवनको कथा व्यथाहरु अटाउन सकोस् आवाजबिहिन व्यक्तिहरु पनि बोल्न सकुन् फक्रदै गरेका ससाना कोपिलाहरु तिम्रै माटोको कण बनेर त्यहि माटोमा अङ्कुराउन र मुस्कुराउन सकुन् निरन्तर प्रगतिशील विकासले दुर्गमतालाई घटाउन सकोस् सोच खोजमा सकारात्मक परिवर्तन गरेर सिर्जनशिलता र बौध्दिकतामा निखारपन ल्याइ विकासका ढोकाहरु सजिलै खोल्न सकियोस् आफ्नो हक जताएर समाजमा निरङ्कुस जाल फिजाउनेहरुको अन्त्य होस् अनि दुर्गमलाई सुगममा परिणत गरेर सुगन्धित वास्ना जताततै छर्न सकियोस् ।
