सोसल मिडिया
रुकुम पश्चिमको मुसिकोट नगरपालिका –४ मुसिडाँडामा रहेको भूकम्पमापन यन्त्र ‘जिपिएस स्टेशन’ सञ्चालनमा आएको छ । राष्ट्रिय भूकम्प मापन केन्द्रको एक टोली आएर मर्मत गरेपछि उक्त स्टेशन सोमबारबाट पुनः सुचारु भएको हो ।
राष्ट्रिय भूकम्प मापन तथा अनुसन्धान केन्द्रका बरिष्ठ भूकम्पविद् डा. लोक विजय अधिकारीका अनुसार उक्त स्टेशन करिब पाँच वर्ष पहिला जडान गरिएको थियो । तीन वर्षअघि बिग्रिएको उक्त जिपिएस स्टेशन विज्ञसहितको टोली आएर मर्मत गरेपछि आजबाट पुनः सुचारु भएको हो ।
उक्त स्टेशनमा रहेको ब्याट्रि लगायतका केहि उपकरणहरुमा खराबी आएको थियो । डा. अधिकारीका अनुसार उक्त स्टेशनले भूकम्पपछि जमिनको सतह तलमाथी, दायाँबाया सरेको मापन गर्दछ । प्रत्येक सेकेन्ड र प्रत्येक तीस/तीस सेकेन्डमा यस जिपिएस स्टेशनले जमिनको चाल मापन गर्ने उहाँको भनाई छ । भूकम्प मापन केन्द्रले देशका विभिन्न ५१ वटा स्थानमा यस खालका जिपिएस स्टेशन स्थापना गरेको छ । केहि स्टेशनहरु प्राविधिक समस्याका कारण अहिले नियमित सुचारु हुन नसकेको बताईन्छ । भूकम्प मापन केन्द्र सबै स्थानमा रहेका भूकम्प मापन यन्त्रहरु सञ्चालनको लागि योजना अघि सारेको छ । यसैगरी रुकुम पश्चिमको सानीभेरी गाउँपालिका वडा नम्वर –४ मेघामा केन्द्रले सिस्मोमिटर जडान गरेको र नियमित सञ्चालनमा रहेको जनाएको छ । यसले भूकम्पको तरंग मापन गर्ने भूकम्पविद् डा. अधिकारीले जनाउनुभयो ।
