सोसल मिडिया
हरेक दिन बिहानै बारीमा पुग्नुहुन्छ, मुसिकोट नगरपालिका –१० का ७० वर्षिय किसान झुपलाल खड्का । उमेरले नेटो काटेपनि झुपलालको कृषि मोह र जाँगरमा कमि देखिन्न ।
दिनभर पसिनाका थोपा चुहाउने झुपलालको बारीमा श्रमपछि फल्ने मोतिले आनन्दित बनाईरहेको छ, सुगन्ध बढिरहेको छ । लसुनबाट सुरु भएको उहाँको कृषि कर्मले अहिले उहाँलाई सुन्तला, अचैलीको व्यवसायिक कृषक बनाएको छ ।
कृषिलाई व्यवसायिकरण नगरेसम्म स्वदेशमै रोजगार र पसिनाको मूल्य हुँदैन भन्ने सोचमा रहनुभएका उहाँले गाउँमा सुरुमै लसुन खेती गर्नुभएको थियो । झुपलाललाई अहिले त्यो साल पनि याद छैन, जुनबेला बेला गाउँका अरु कसैले पनि लसुन लगाउनुपर्छ भन्ने सोच राखेका थिएनन् । त्यतिबेला मुसिकोट नगरपालिका – १० को झ्याङ गाउँमा उहाँले लसुन खेति सुरु गर्नुभयो ।
लसुन राम्रो फल्न थाल्यो । बिक्रि पनि भयो । उहाँले लसुन खेतीलाई विस्तार गर्दै लैजानुभयो । पछिल्लो चार वर्षदेखि लसुनले राम्रै बजार पाईरहेको छ । ‘तीन वर्ष पहिला नै मैलै लसुन बेचेर एक सिजनमा तीन लाख कमाएको हुँ,’ झुपलालले भन्नुभयो, ‘ आफ्नै माटोमा मेहेनत गरे फल अवश्य पाईन्छ ।’
अहिले उहाँको बारीमा लसुन मात्रै छैनन् । सुन्तला र अलैंची खेती फस्टाएको छ । झुपलालले यो बर्ष ६० हजार रुपियाँको सुन्तला घरबाटै बिक्रि गरेको उहाँले बताउनुभयो । वडा सरकारले व्यापारीलाई सहजिकरण गरिदिएपछि बारीबाटै सुन्तला बिक्रि भएको उहाँको भनाई छ ।
तीन वटा पाखोबारीमा सुन्तला खेती गर्नुभएका झुपलालले कुनै सिजनमा सुन्तला उत्पादन राम्रो हुँदा एक लाख रुपियाँ कमाएको सम्झनुभयो । लसुन र सुन्तलाले बजार पाएपछि यो वर्षदेखि उहाँले खेती बिस्तार गर्नुभएको छ ।
कर्म गर्न बुढेसकालले नछेक्ने उहाँले बताउनुहुन्छ । झुपलालका दुई भाई छोरा बैदशिक रोजगारीमा गएको लामो समय भयो । एउटा छोराले जिल्ला सदरमुकाममा व्यवसाय गर्नुभएको छ । आफू ७० वर्षको हुँदा पनि कृषिको माया उत्तिकै लाग्ने उहाँले सुनाउनुभयो ।
झुपलालले सुन्तला लगाएको बारीमा अलैंची पनि रोप्नु भएको छ । बिहानै देखि बारीमा गोडमेल गर्ने, माटोसँग खेल्ने, रमाउने बानी नै भएको उहाँले बताउनुभयो । उहाँले भन्नुभयो, ‘अर्गानिक फलाउँछु, अरुलाई पनि अर्गानिक खुवाउँछु, बुढेसकाल लागे पनि कृषिमै रमाउन मन छ ।’
उहाँले फलाएको कृषि उपज बारीबाटै बिक्रि हुन्छ । लसुन, सुन्तला र अलैचीको बजारका लागि भौतारिनु परेको छैन । व्यापारीहरु गाउँमै पुग्छन् । वडा कार्यालयले लसुनको बिउ उपलब्ध गराउन थालेपछि झुपलालले व्यावसायिक लसुन खेती गर्न थाल्नुभएको हो । वडा कार्यालय नै बजारको व्यवस्था गर्न सहजिकरण गरिदिएको छ ।
उहाँ वडाभित्र धेरै लसुन बिक्री गर्ने किसानमा सबैभन्दा अगाडि हुनुहुन्छ । चालु आर्थिक वर्षमा प्रधानमन्त्री कृषि आधुनिकरण परियोजना अन्तर्गत कृषि विकास कार्यालयले वडामा लसुन ब्लक र पकेट क्षेत्र घोषणा गरी काम गरिरहेको छ ।
लसुन उत्पादन बढाउनका चालु आर्थिक बर्षमा परियोजनाबाट १५ लाख बजेट विनियोजन भएर बिउ वितरण गरिएको वडा अध्यक्ष धनबहादुर खड्काले जानकारी दिनुभयो । वडाका झ्याङ, झान्डारी, जुगेखोर्या, गलमपाटी, खर्सुपानी, चौर र भेरीखोला टोलमा उत्पादन भएका लसुन सदरमुकाम खलङ्गासहित जिल्ला बाहिर पनि पुग्ने गरेको छ । गत वर्ष यहाँका किसानले ३५ लाख बराबरको लसुन बिक्री गरेका थिए ।
