सोसल मिडिया
रुकुम पश्चिमको एक वडाले विवाहमा दिइने निमन्त्रणा कार्डमार्फत बाल विवाह, मदिरा र सुर्तीजन्य पदार्थ नियन्त्रणको लागि पहल सुरु गरेको छ।
जिल्लाको आठविसकोट नगरपालिका वडा नम्बर ३ ले विवाहको निमन्त्रणा कार्डलाई बाल विवाह, मदिरा र सुर्तीजन्य पदार्थ नियन्त्रणका लागि प्रयोग गर्ने जनाएको छ ।
वडा अध्यक्ष केशरमान बिकले वडा क्षेत्रमा हुने विवाहमा निमन्त्रणा गरिने कार्डमा अनिवार्य रूपमा बेहुला बेहुलीको जन्मदर्ता उल्लेख गर्नुपर्ने बताउनुभयो । यसका साथै निमन्त्रणा कार्डमा नै विवाह गर्ने घरमा मदिरा र सुर्तीजन्य पदार्थ प्रयोग नगर्ने, नगराउने प्रतिबद्धता समेत उल्लेख हुनुपर्ने सूचना वडाले सार्वजनिक गरेको छ ।
वडा अध्यक्ष बिकले वडाक्षेत्रमा मदिरा र सुर्तीजन्य पदार्थ निषेध गरिएको बताउनुभयो । वडा सरकार बाल विवाह विरुद्धको कानुनी ब्यबस्था कार्यान्वयनतर्फ कडाईका साथ लागेको छ । यसका लागि विवाहको निमन्त्रणा कार्डलाई पनि उपयोग गर्न खोजिएको वडा अध्यक्ष बिकले जनाउनुभयो ।
विवाहको कार्डमा नै यस्तो खबर पठाइएमा बाल विवाह नियन्त्रण हुने र सार्वजनिक स्थान तथा समारोहमा मदिरा तथा सुर्तीजन्य पदार्थको प्रयोग बन्द हुने वडा कार्यालयको विश्वास रहेको छ ।
यसैगरी आठविसकोट नगरपालिका वडा नम्बर १४ ले पनि मदिराजन्य पदार्थ नियन्त्रणका लागि एक सूचना जारी गरेको छ । वडा अध्यक्ष प्रेम पुनका अनुसार वडा कार्यालय, विद्यालय, स्वास्थ्य संस्था लगायतका सार्वजनिक क्षेत्र वरिपरी भित्र मदिरा सेवन तथा बिक्रीवितरणमा रोक लगाईएको छ ।
उहाँले सार्वजनिक क्षेत्रको पाँच सय मिटर क्षेत्रभित्र मदिराजन्य पदार्थ बिक्रि विरतणमा रोक लगाईएको जनाउनुभयो । सूचनाको वेवास्ता गरिएमा कारबाहि हुने समेत वडा कार्यालयले जनाएको छ ।
