रुकुम पश्चिमको चौरजहारी नगरपालिका वडा नम्वर १२ मा रहेको जनकल्याण माध्यमिक विद्यालय सानाखोलाका एक शिक्षकले बिद्यार्थी कुटपिट गरेको गुनासो रहेको छ । 

विद्यालयमा कार्यरत शिक्षक खड्क रोकायले कक्षा ३ मा अध्ययनरत छात्र धिरज आचार्यलाई कुटपिट गरेर घाईते बनाएको बताईन्छ । धिरजका बुवा दामोदर आचार्यले मंगलबारका दिन विद्यालयमा पढ्न गएको छोरालाई शिक्षकले कुटपिट गरेको बताउनुभयो । उहाँले शिक्षक रोकायको कुटाईबाट छोराको टाउको, ढाड र छातीमा चोट लागेको बताउनुभयो । 

चोटको कारण रातभर सुत्न नसकेको उल्लेख गर्नुहुँदै उहाँले बुधबार बिहानै चौरजहारी अस्पतालमा उपचारको लागि लिईएको जानकारी दिनुभयो । उहाँले चौरजहारी अस्पतालमा सामान्य उपचार गरिएको र थप उपचारको लागि सुर्खेत या नेपालगञ्ज जान अस्पतालले सिफारिस गरेको बताउनुभयो । टाउकोको सिटिस्क्यान गर्नुपर्ने भएकोले बाहिर रिफर गरेको उहाँको भनाई छ । 

आफूलाई खड्क सरले लात्तिले ढाडमा र हातले गालामा हानेको, उचालेर पछारेको र टाउकोमा चोट लागेको कुरा बताएको बुवा दामोदरले उल्लेख गर्नुभयो । अहिले ईलाका प्रहरी कार्यालयमा उजुरी दिन थालेको उहाँको भनाई छ ।

यस बिषयमा जनकल्याण माविका प्रधानाध्यापक झुपलाल शर्माले शिक्षक रोकायले धिरजलाई सामान्य कुटपिट गरेको जनाएको उल्लेख गर्नुभयो । कक्षाका अन्य बिद्यार्थीहरुसँग झगडा गरेको र छात्राहरुले आफूहरुलाई कुटेको भन्दै कुरा लगाएपछि शिक्षक रोकायले अबदेखि यस्तो झगडा गर्नुहुन्न भन्दै सामान्य पिटेको उहाँको भनाई छ ।

विद्यालयबाट घर जाँदा धिरज राम्रैसँग गएको तर अहिले एक्कासी कुटपिटको कारण बिरामी भएको सुनिएको उहाँले बताउनुभयो । यस बिषयमा थप जानकारी लिने प्रधानाध्यापक शर्माको भनाई छ ।