रुकुम पश्चिम । रुकुम पश्चिमका समाजवादी घटक दलहरुको मोर्चा समाजवादी मोर्चाले यहि फागुन २१ गतेका दिन रुकुम पश्चिमको मुसिकोट खलंगामा सन्देश सभा गर्ने भएको छ । मोर्चाको आज बसेको जिल्ला संयोजन समितिको बैठकले उक्त निर्णय गरेको हो । 

मोर्चाका अध्यक्ष गोविन्द रोका सचिनका अनुसार सन्देश सभाको सहभागिता व्यवस्थापनका लागि मोर्चाका पालिकास्तरिय संयोजन समितिहरु र मोर्चामा आवद्ध राजनैतिक दलका पालिकास्तरिय समितिहरु सक्रिय रहनेछन् । 

त्यसैगरी बैठकले मोर्चालाई पालिकास्तरमा समेत बिस्तार गर्ने निर्णय गरेको छ । फागुन १९ गतेभित्र रुकुम पश्चिमका ६ वटै पालिकामा मोर्चाको संयोजन समिति गठन गरिसक्ने निर्णय भएको छ ।  

मोर्चामा नेकपा (एकीकृत समाजवादी) का जिल्ला उपाध्यक्ष एवं केन्द्रीय परिषद सदस्य माधव प्रसाद गौतम, नेपाल कम्युनिष्ट पार्टीका केन्द्रिय सदस्य चन्द्र सी, नेकपा (माओवादी केन्द्र) का कर्णाली प्रदेश सदस्य राधा रोकाय, नेकपा (एकीकृत समाजवादी) का जिल्ला सचीव सुरज परियार र नेपाल कम्युनिष्ट पार्टीका जिल्ला सचिवालय सदस्य अनिता सी सदस्य को रुपमा रहनुभएको छ । 

समितिको संयोजकत्व समाजवादी मोर्चा नेपालको कार्यविधि, २०८० अनुसार हरेका चार चार महिनामा आलोपलो प्रणाली अनुसार हुने गर्दछ ।