रुकुम पश्चिममा वन क्षेत्रमा अवैध फडानी गरेको आरोपमा दुई जना पक्राउ परेका छन् । 

डिभिजन वन कार्यालय रुकुम पश्चिमले एक जना महिला र एक जना पुरुषलाई राष्ट्रिय वन क्षेत्रमा अवैध वन फडानी गरेको आरोपमा पक्राउ गरेको जनाएको छ । 

डिभिजन वन कार्यालयका प्रमुख शेर बहादुर परियारका अनुसार रुकुम पश्चिमको चौरजहारी नगरपालिका वडा नम्वर ४ निवासी ४० वर्षिया कमला बि.क. र मुसिकोट नगरपालिका वडा नम्वर ११ निवासी ४४ वर्षिय कृष्ण बहादुर पुनलाई पक्राउ गरिएको हो । 

पुनलाई शुक्रबार र  बि.क.लाई बिहिबारका दिन पक्राउ गरिएको हो । दुवै जनालाई स्थानीयस्तरको राष्ट्रिय वन क्षेत्रमा अवैध रुख कटान गरेको आरोप लागेको छ ।  

बि.क.ले ११ वटा सल्ला प्रजातिको रुख र पुनले ४२ वटा मौवा प्रजातिसहितका अन्य रुख अवैध रुपमा काटेको बताईएको छ । 

बि.क.लाई रुकुम जिल्ला अदालतबाट तीन दिन र पुनलाई सात दिनको म्याद थप गरेर अनुसन्धान सुरु गरिएको छ । दुवै जनालाई जिल्ला प्रहरी कार्यालय रुकुम पश्चिमको हिरासतमा राखिएको छ ।