रुकुम पश्चिमको चौरजहारी नगरपालिका ९ गुर्तालगाउँमा आगलागी भएको छ । 

आगलागीको कारण गुर्तालगाउँका उदे सार्कीको घर र गोठ पूर्ण रुपमा क्षती भएको नेकपा माओवादी केन्द्र चौरजहारीका सचिव एलबि कटुवालले जानकारी दिनुभयो । उहाँका अनुसार गएराती १२ बजेतिर सार्कीको घरमा आगलागी भएको हो । 

स्थानीय कृष्ण मल्लका अनुसार आगलागीबाट मानविय क्षती भने भएको छैन । सार्कीको घरमा रहेका अन्नपात, लत्ताकपडा लगायतका सामाग्री जलेर नष्ट भएको छ । 

सुरुमा सार्कीको घर छेउमा रहेको गोठमा आगलागी भएको र त्यसपछि दुई तले घरमा आगो सल्किएको मल्लले बताउनुभयो  । आगलागीबाट घरमा पालिएका केहि कुखरा समेत मरेको बताईएको छ । 

अहिले चौरजहारी नगरपालिकाको एक टोलीले सार्कीको घरमा राहत सामाग्री उपलब्ध गराएको छ ।