आगामी चैत १५ गतेदेखि सुरु हुने माध्यमिक शिक्षा परीक्षा (एसइई) का लागि रुकुम पश्चिममा २३ वटा परीक्षा केन्द्र तोकिएको छ । 

शिक्षा विकास तथा समन्वय इकाई रुकुम पश्चिमका प्रमुख तारा प्रकाश पुनका अनुसार जिल्लाभर २३ वटा परिक्षा केन्द्र मार्फत एसइई सञ्चालन गर्ने तयारी भएको हो । उहाँका अनुसार यस वर्षको एसइई परीक्षामा रुकुम पश्चिमबाट तीन हजार ५९३ जना विद्यार्थीले सहभागिता जनाउने छन् । 

परीक्षामा साधारणतर्फ एक हजार ७६२ छात्रा र एक हजार ७०८ छात्र गरेर जम्मा तीन हजार ४७० जना विद्यार्थी सहभागी हुने बताईन्छ । 

त्यसगैगरी प्राविधिकतर्फ ४७ जना छात्रा  र ४९ जना छात्र गरेर ९६ जना र ग्रेड वृद्धितर्फ १२ जना छात्रा र १५ जना छात्र गरेर २७ जना विद्यार्थी सहभागी हुने इकाई प्रमुख पुनले बताउनुभयो ।

प्राविधिक बिषयतर्फ शीतल माध्यमिक विद्यालय चौरजहारीमा सिभिल इन्जिनियर, राप्ती ज्ञानोदय माध्यमिक विद्यालय सिम्लीमा पशु विज्ञान र भेरी दोभान माध्यमिक विद्यालय चाईनाबगरमा बाली विज्ञान पढाई हुने गर्दछ । 

एसइईमा जिल्लाका ८२ वटा विद्यालयका विद्यार्थीहरु सहभागी हुनेछन् । जसमध्य ७६ वटा सामुदायिक, एक वटा खुल्ला र पाँच वटा संस्थागत विद्यालय रहेका छन् । परीक्षा मर्यादित एवं शान्तिपूर्ण वातावरणमा सम्पन्न गर्न केन्द्राध्यक्षहरुलाई चैत १२ गते तालिम दिने तयारी भइरहेको जनाईएको छ ।

एसइई आगामी चैत १५ गतेदेखि २७ गतेसम्म सञ्चालन हुने तालिका रहेको छ । परीक्षा केन्द्र तोकिएका विद्यालयका प्रधानाध्यापकहरुलाई नै केन्द्राध्यक्ष तोकिने जनाईएको छ ।