सोसल मिडिया
रुकुम पश्चिमको मुसिकोट नगरपालिका –७ को चकचरीमा निर्माणाधिन खानेपानी आयोजनाको काम अन्तिम चरणमा पुगेको छ ।
मुसिकोट नगरपालिकाद्वारा सञ्चालित नेपाल शहरी शासकिय कार्यक्रम अन्तर्गत निर्माणाधिन खानेपानी आयोजना यहि चैत महिना भित्रै सम्पन्न भईसक्ने बताईएको छ । शासकिय कार्यक्रमका सामाजिक परिचालक पााँचौ शोबिराम केसीका अनुसार पाँच लाख रुपियाँको लगानीमा उक्त योजना निर्माण हुन थालेको हो ।
यो योजना निर्माण सम्पन्न भएमा यहाँका ५५ घर परिवारले खानेपानीको सहज सुविधा पाउँने बताईएको छ । यस योजना अन्तर्गत स्थानीय ठूलिमुलको पानी संरक्षण गरेर चकचरी गाउँसम्म पाईप लाईन बिछ्याउने र पानी ट्याङकी निर्माण हुनेछ ।
हालसम्म मूल संरक्षण र ठुलो ट्याङकी निर्माणको काम सम्पन्न भईसकेको केसीले जानकारी दिनुभयो । उहाँका अनुसार अब पाईप लाईन तानेर घरघरमा खानेपानीको सुविधा वितरण हुनेछ ।
सामाजिक परिचालक केसीले एक महिना अघिबाट उपभोक्ताहरुको सहभागितामा निर्माण सुरु गरिएको उक्त योजना अन्तिम चरणमा पुगेको छ ।
यसैबिच निर्माणाधिन उक्त योजनाको शुक्रबार मुसिकोट नगर कार्यपालिकाको तर्फबाट अनुगमन समेत गरिएको छ । नगर प्रमुख महेन्द्र केसी, वडा अध्यक्षहरुसहितको टोलीले अनुगमन गरेको हो ।
अनुगमनको क्रममा नगर प्रमुख केसीले निर्माण समितिलाई समयमै र गुणस्तरिय रुपमा आयोजना बनाउन सुझाव दिनुभएको छ । उहाँले निर्माण समितिसँग योजनाको प्रगती र अन्य विषयमा छलफल समेत गर्नुभएको थियो ।
अनुगमनमा वडा नम्वर ७ का वडा अध्यक्ष एक्क बहादुर पाण्डे, वडा नम्वर ५ का वडा अध्यक्ष समिर जंग मल्ल, वडा नम्वर २ का वडा अध्यक्ष दिनेश खड्का, वडा नम्वर ८ का वडा अध्यक्ष जयबहादुर थापा मगर, मुसिकोट नगरपालिकाका लेखापाल केदार शर्मा, सामाजिक परिचालक शोबिराम केसीको उपस्थिति रहेको थियो ।
