सोसल मिडिया
रुकुम पश्चिममा धारिलो हतियार प्रहार हुँदा एक महिला घाईते हुनुभएको छ ।
जिल्लाको सानीभेरी गाउँपालिका ४ निवासी ४१ वर्षिया कालिका देवी मल्लमाथि बिहिबार बेलुका हतियार प्रहार भएको हो ।
घाईते कालिका देवीका नन्द लक्ष्मी मल्लले दिनुभएको जानकारी अनुसार स्थानीय गारछाला भन्ने स्थानमा गिट्टी कुटिरहेको बेला पछाडिबाट आएर सोहि गाउँका भिमसेन मल्लले धारिलो हँसिया प्रहार गरेर घाईते बनाएका हुन् ।
हतियार प्रहारबाट मल्लको घाँटि नजिकको भागमा गहिरो चोट लागेको छ । घाईते मल्ललाई उपचारको लागि चौरजहारी अस्पताल हुँदै बिहिबार राती नै थप उपचारको लागि नेपालगञ्ज ल्याईएको घाईतेकी नन्द लक्ष्मी मल्लले बताउनुभयो । भाउजुको घाँटि छुट्याउने नियतका साथ हतियार प्रहार भएको उहाँको भनाई छ ।
उहाँका अनुसार यस अघि आक्रमणकारीले घाईतेका परिवारका महिलाहरुलाई हातपात गरेका थिए । गाउँलेहरु मिलेर भिमसेनलाई डोरीले बाँधेर स्थानीय प्रहरी जिम्मा लगाईएको र पछि मेलमिलाप गरेर छोडिएको थियो ।
भिमसेनले सोहि रिसिबीको कारण हतियार प्रहार गरेको हुनसक्ने बताईएको छ ।
मल्ललाई घाईते बनाएका भिमसेन फरार रहेको र उनको खोजि भईरहेको जिल्ला प्रहरी कार्यालय रुकुम पश्चिमले जानकारी दिएको छ ।
