रुकुम पश्चिमको चौरजहारी नगरपालिका –४ मा सामुदायिक भवन निर्माणको काम सुरु भएको छ । 

स्थानीयकै श्रमदान र आर्थिक रकम संकलनबाट सार्वजनिक भवन निर्माण हुन थालेको हो । चौरजहारी नगरपालिका वडा नम्वर ७ का वडा सदस्य समिर केसीको अगुवाईमा भवन निर्माण हुन थालेको हो ।

मनकोटको कालिमाटी डाँडामा चैत ३ गतेबाट उक्त भवन निर्माण गर्न थालिएको केसीले बताउनुभयो । उहाँका अनुसार आगामी बैशाख महिना भित्र भवन निर्माण गरिसक्ने लक्ष्य राखिएको छ । 

सामुदायिक भवन निर्माणका लागि स्थानीय सरकार र प्रदेश सरकार समक्ष बारम्बार माग गर्दा पनि सुनुवाई नभएपछि स्थानीयकै लगानीमा भवन निर्माण सुरु गरिएको हो । दुई वर्ष देखि सामुदायिक भवन बनाईदिन माग राखेपनि बेवास्ता गरिएको केसीको भनाई छ । विभिन्न व्यक्तिहरुबाट आर्थिक सहयोग संकलन गरेर स्थानीयहरुको श्रमदानबाट भवन निर्माण गरिने उहाँको भनाई छ । 

तीन कोठे भवनका लागि करिब आठ लाख रुपियाँ लाग्ने अनुमान रहेको छ । उक्त भवनमा एक सभाहल, स्टोर कोठा र कार्यालय कोठा रहने छन् । यसमा नव कल्पना सामुदायिक वनको कार्यालय राख्ने योजना स्थानीयको रहेको छ ।

सामुदायिक भवनको लम्बाई ४० फिट र चौडाई २२ फिट रहेको छ । सामुदायिक भवनबाट यहाँका ७० घरपरिवार लाभान्वित हुने बताईएको छ ।