रुकुम पश्चिम । चौरजहारी नगरपालिकामा ६४९ जनाको नि:शुल्क आँखा जाँच तथा उपचार गरिएको छ । नगरपालिका भित्रका वडा नम्बर १३ र १४ मा रहेका आँखा सम्बन्धी समस्या भएका नागरिकहरूको सहज उपचारका लागि सहिद स्मृति नगर अस्पतालमा शिविर मार्फत नि:शुल्क आँखा जाँच गरिएको हो ।

चौरजहारी नगरपालिकाका निमित्त प्रमुख प्रशासकीय अधिकृत शेर प्रसाद ढकालका अनुसार चैत्र १९ गदेदेखि तीन दिनसम्म चलेको शिविरमा २९० जनालाई नि:शुल्क औषधि सहित उपचार प्रदान गरिएको छ । १४७ जनालाई चश्मा वितरण गर्नुका साथै ५८ जना मोतिविन्दुको समस्या भएका बिरामी रिफर गरिएको छ ।

नगरपालिकाले घर नजिकै आँखा उपचार शिविर सञ्चालन गरेर ठूलो गुण लगाएको चौरजहारी नगरपालिका -१० की सीता कामीले बताउनुभयो । 'उपचारका लागि कहाँ जाने कसरी जाने थाहा थिएन,' उहाँले भन्नुभयो 'घर नजिकै आएर सेवा पाउँदा निकै खुसी लागेको छ ।'

चौरजहारी नगरपालिकाको आयोजना र नेपाल नेत्रज्योति सङ्घ एकीकृत आँखा तथा कान स्वास्थ्य कार्यक्रम कर्णाली प्रदेशको समन्वयमा संचालित उक्त शिविरको स्थानीय जनप्रतिनिधि, शिक्षक, वुद्धिजीवि लगायत स्थानीय वासीहरूले सहयोग तथा सहजीकरण गरेका थिए ।

शिविर सञ्चालन सहयोग गर्ने सहयोगी निकाय तथा स्वास्थ्यकर्मीहरूलाई नगरपालिकाले धन्यवाद समेत व्यक्त गरेको छ । नागरिकहरूको सेवामा सहज पहुँचका लागि नगरपालिकाले स्वास्थ्य शिविर, एकीकृत घुम्ती सेवा लगायतका कार्यक्रमहरू सञ्चालन गर्दै आएको छ ।