सोसल मिडिया
रुकुम पश्चिमको त्रिवेणी गाउँपालिकामा एक भूकम्पपीडितको अस्थायी आवास (टहरा) मा आगलागी भएको छ ।
मंगलबार बेलुका त्रिवेणी गाउँपालिका वडा नम्वर ५ घोरनेटी निवासी चन्द्रकला घर्तीको अस्थायी आवासमा आगलागी भएको हो ।
वडा अध्यक्ष रनबहादुर पुनका अनुसार खाना पकाउने क्रममा चलेकाे हावाहुरी कारण टहरामा आगो सल्केकाे हो । गत कात्तिक १७ गते जाजरकोट केन्द्रबिन्दु भएर आएको भूकम्पको कारण घर क्षती भएपछि घर्तीको सात जनाको परिवार अस्थायी टहरामा बस्दै आएको वडा अध्यक्ष पुनले जानकारी दिनुभयो ।
आगलागीबाट टहरासहित त्यसमा रहेका अन्नपात, लत्ताकपडा, नागरिकता, जन्मदर्ता लगायतका कागजात लगायतका सामाग्री जलेर नष्ट भएका छन् । करिब दुई लाख बराबरको सामाग्री जलेर नष्ट भएको छ ।
आगलागी पीडित घर्तीको परिवारलाई वडा कार्यालयले तत्कालको लागि एक बोरा चामल, एक पेटी तेल, पाँच किलो दाल, पाँच पोको नुन दिने भएको छ । केहि बेरमा पीडितको घरमा गएर राहत उपलब्ध गराईने वडा अध्यक्ष पुनले बताउनुभयो ।
गर्मियाममा हावाहुरीको कारण अरुको तुलनामा अस्थायी आवासमा आगलागीको जोखिम रहेको बताईन्छ । वडा अध्यक्ष पुनले यस समयमा आगलागी हुनसक्ने जोखिम उच्च रहेकोले सावधानी अपनाउन अनुरोध गर्नुभएको छ ।
