सोसल मिडिया
सानीभेरी गाउँपालिका वडा नम्वर ३ को गुमाखोला सिम्तारा सामुदायिक वन क्षेत्रमा आगलागी भएको छ । मंगलबार बिहान ११ बजेबाट त्यसक्षेत्रमा लागेको आगोले ठुलो रुप लिएको छ ।
डिभिजन वन कार्यालय रुकुम पश्चिमका अनुसार वन डढेलो भिषण अवस्थामा रहेकोले नियन्त्रण गर्न सकिएको छैन । गुमाखोला सिम्तारा सामुदायिक वन क्षेत्रबाट मौराखारा वन क्षेत्रतर्फ आगो फैलिएको डिभिजन वन कार्यालयका प्रमुख शेरबहादुर परियारले जानकारी दिनुभयो ।
उहाँका अनुसार वन डढेलो अत्यन्तै ठुलो रहेको छ । हालसम्म यहाँको करिब ७० हेक्टर वन क्षेत्रमा डढेलो लागेको छ । विभिन्न प्रजातिका सयौ बोटबिरुवाहरु नष्ट भएका छन् ।
त्यसक्षेत्रका सर्वसाधारणहरुलाई सतर्क तथा सुरक्षित भएर बस्न र आफ्नो धनमालको सुरक्षा गर्न डिभिजन वन कार्यालयले अनुरोध गरेको छ । डिभिजन वनका कर्मचारी, सुरक्षाकर्मी र स्थानीयवासी समेतले प्रयास गर्दा पनि आगो नियन्त्रण गर्न नसकिएको बताईएको छ ।
बर्षौसाल यस क्षेत्रमा ठुलो मात्रामा आगलागी हुने गरेको छ । मौराखारा क्षेत्रलाई जैविक विविधतायुक्त क्षेत्र बनाउने सानीभेरी गाउँपालिकाको अभियानलाई हरेक वर्ष हुने आगलागीका घटनाहरुले प्रभावित पारेको बताईन्छ ।
